SOU Festival თარიღებს აანონსებს


გააზიარე სტატია

SOU 2018 წელს მრავალი სიახლით ამჯერად შემოდგომაზე ბრუნდება.

28 სექტემბრიდან 30 ნოემბრამდე ფესტივალი კვლავ წარმოადგენს თანამედროვე ხელოვნების მრავალფეროვან პროგრამას.

SOU 2018-ის სრული პროგრამა 6 აგვისტოს გახდება ცნობილი.

არსებობის მესამე წელს SOU თბილისის საზღვრებს გასცდება და დედაქალაქთან ერთად საქართველოს სხვადასხვა ქალაქში იმოგზაურებს, კვლავაც, მიძინებული კულტურული დინებებისა და სახელოვნებო სივრცეთა განახლებისა და გაცოცხლების სურვილით.

SOU 2018-ს განსაკუთრებულს გახდის მსოფლიოს მრავალ მნიშვნელოვან აკადემიურ და კულტურულ ცენტრთან სხვადასხვა ფორმატის თანამშრომლობის შედეგად ჩამოყალიბებული საგანმანათლებლო კომპონენტები, რომლებიც ახალ შესაძლებლობებს შექმნის მრავალი ხელოვანისათვის.

ფესტივალი წელს კვლავ წარმოადგენს თანამედროვე მუსიკას, ვიზუალურ ხელოვნებას, აკუსტიკურ ექსპერიმენტებს, ახალ ოპერას, მუსიკალურ თეატრს, ციფრულ და მედია ხელოვნებას, თანამედროვე ცეკვას, ბგერის კვლევებს, ინტერაქციას ტრადიციულ მუსიკასთან და სხვა მრავალ საინტერესო სახელოვნებო მიმართულებას.

ფესტივალი პირველად 2016 წელს შედგა. მან თბილისში საერთაშორისოდ აღიარებული ხელოვანების ცოცხალი მუსიკითა და ვიზუალური ხელოვნების პროგრამებით 5 საკონცერტო და კულტურული სივრცე გააცოცხლა.

ფოტო: SOU FESTIVAL 2017, მარიამ ჯანაშია

 

2017 წელს ფესტივალის ფარგლებში თბილისში უკვე 22 კონცერტი და 2 გამოფენა გაიმართა. ფესტივალმა თბილისის ყველა საკონცერტო დარბაზი და ალტერნატიული სივრცე მოიცვა.

SOU-ს მონაწილეთა შორის იყვნენ: რიოჯი იკედა, ლორენს ინგლიში, კარსტენ ნიკოლაი, ბიორკი, ბლიქსა ბარგელდი, რობერტ ჰენკე და მრავალი სხვა.

ფოტო: SOU FESTIVAL 2017, გიორგი დადიანი

SOU ფესტივალის გამოწვევად რჩება დღევანდელი კულტურული პროცესების უკვე დამკვიდრებული კონტექსტები ‒ არქიტექტურა, ინდივიდუალური და კოლექტიური მეხსიერაბა, ფიზიკური გამოცდილება, დეფინიციები, კულტურული იერარქია და სხვა ყველაფერი რაც გამოცდილების წინასწარ განსაზღვრულ მოდელებს ქმნის და შესაძლებლობათა მრავალფეროვნებას ზღუდავს.

SOU სწორედ ამ მოდელებს აყენებს კითხვის ნიშნის ქვეშ, ფესტივალის საქმიანობა და მისი თითოეული ღონისძიება, საქართველოში მრავალფეროვანი და მხატვრული ღირებულებით გამორჩეული კულტურული ცხოვრების შექმნასა და წახალისებას ისახავს მიზნად.


მიიღე ყოველდღიური განახლებები!
სიახლეების მისაღებად მოგვწერეთ თქვენი ელ.ფოსტა.