აქტიური საგანმანათლებლო ბლოგები საქართველოში

განათლებისა და ბავშვთა აღზრდის თემაზე მსოფლიო ინტერნეტში უამრავი ბლოგია, რომლებსაც მშობლები, მასწავლებლები, ოჯახის ფსიქოლოგები, განათლების სპეციალისტები და ბავშვებთან მომუშავე ადამიანები ქმნიან და საკმაოდ საინტერესო კონტენტსაც გვთავაზობენ, რომელიც ძირითადად ერთმანეთისთვის გამოცდილების გაზიარებას ისახავს მიზნად.

ქართულ ინტერნეტში ძალიან ბევრი ბლოგი მოიძებნება, რომლებიც, როგორც ჩანს, სხვადასხვა სკოლის მასწავლებლებს კონკრეტული დავალების ფარგლებში აქვთ შექმნილი და მათ კონტენტს ძირითადად საგაკვეთილო პროცესის მოსაწყენი აღწერები შეადგენს.

ამ ტიპის ბლოგები წლების წინ არის შექმნილი და დღეს ალბათ ავტორებსაც აღარ ახსოვთ მათი არსებობა, არათუ მკითხველებს.

ჩვენ დავინტერესდით, არსებობს თუ არა სასარგებლო და ცოცხალი ბლოგები განათლების საკითხების შესახებ და სამი ასეთი ვიპოვეთ კიდეც:

http://www.ganatlebisreforma.com/ ამ ბლოგზე რეგულარულად იწერება განათლების რეფორმის შესახებ. აქ წაიკითხავთ იმის თაობაზე, თუ რა არგუმენტები დგას სხვადასხვა გადაწყვეტილების უკან და მისი მიზანია, რომ ხელი შეუწყოს საქართველოში განათლების პოლიტიკის გააზრებას. ბლოგში რეგულარულად იწერება განათლების რეფორმის შესახებ.
ბლოგს ამჟამად ჰყავს ორი ავტორი: სიკო ჯანაშია და მუად’დიბი.
მუად’დიბი ფსევდონიმია ერთი საინტერესო ადამიანის, რომელიც განათლების სფეროს გულშემატკივარია. სიმონ ჯანაშია კი განათლების სპეციალისტია.

https://ganatlebageo.wordpress.com/ – საინტერესო და სახალისო თემები ბავშვების აღზრდასთან დაკავშირებით. ავტორმა ეს ბლოგი მას შემდეგ შექმნა, რაც თვითონ, როგორც დედას, დაუგროვდა კითხვები და მათზე პასუხების მოძიება დაიწყო. ბლოგის ხიბლი სწორედ იმაში მდგომარეობს, რომ პირად გამოცდილებას თან ერთვის ავტორის მიერ ამა თუ იმ თემაზე დამუშავებული სპეციალისტების მოსაზრებები, კვლევები და მათთან დამაკავშირებელი ბმულები.

http://edulab.ge/ – EDULAB არის საგანმანათლებლო ვებგვერდი, რომლის მიზანია დაეხმაროს მათ, ვინც დაინტერესებულია პროფესიული განვითარებით, ვისაც სურს დროულად მიიღოს ინფორმაცია საქართველოსა და საზღვარგარეთ დაგეგმილი საგანმანათლებლო აქტივობების შესახებ.

Edulab-ის საძიებო სისტემა დაგეხმარებათ მარტივად მოიძიოთ თქვენთვის სასურველი ინფორმაცია საქართველოს უნივერსიტეტებისა და საგანმანათლებლო ცენტრების შესახებაც. გვერდზე არსებული კატეგორიები კი, სადაც ინფორმაცია ყოველდღიურად ახლდება, დაგეხმარებათ უკეთესად დაგეგმოთ თქვენი მომავალი .