მე-19 საუკუნის მეორე ნახევრიდან ასტრონომიისა და ასტროფიზიკის დარგებს ციური სხეულების კვლევისას ფოტოგრაფიის სახით კიდევ ერთი მეტად საჭირო მეკავშირე გამოუჩნდა.
ფოტოგრაფიამ მნიშვნელოვნად გააღრმავა კოსმოსური ობიექტების შესახებ არსებული ცოდნა და დღეს ძნელად წარმოსადგენია ასტრონომიულ მეცნიერებათა რომელიმე მიმართულება მის გარეშე.
ციური სხეულების ფოტოგრაფირება პირველად ფრანგმა მეცნიერმა, “დაგეროტიპის” გამომგონებელმა ლუი დაგერმა მოისურვა. 1839 წელს მან მთვარის დაფიქსირება სცადა, თუმცა ნამუშევარზე დედამიწის თანამგზავრი გადღაბნილ ლაქად აისახა.
მომდევნო წელს კი ნიუ-იორკის უნივერსიტეტის პროფესორმა, ქიმიკოსმა ჯონ დრეიპერმა მიაღწია წარმატებას. 1840 წლის 23 მარტს ტელესკოპ-რეფლექტორისა და დაგეროტიპის გამოყენებით ასტროფოტოგრაფიაში ერთ-ერთი ყველაზე ცნობილი გამოსახულება მიიღო.
დროთა განმავლობაში ვითარდებოდა ფოტოტექნიკა, შესაბამისად, უმჯობესდებოდა და იხვეწებოდა გამოსახულების ხარისხიც. გარდა მეცნიერული დანიშნულებისა, ასტროფოტოგრაფია ხელოვნების დარგადაც იქცა.
დღეს მსოფლიოში უამრავი პროფესიონალი თუ მოყვარული აკვირდება ციურ სხეულებს და ქმნის უნიკალურ გამოსახულებებს, ატარებს ექსპერიმენტებს პეიზაჟურ თუ კონცეპტუალურ ჟანრებში. მათ აღმოსაჩენად მრავალი ფოტო-ფესტივალი თუ ფორუმი იმართება.
ერთ-ერთი ყველაზე ცნობილი კონკურსი – Insight Astronomy Photographer of the Year – 2009 წლიდან გრინვიჩის სამეფო ობსერვატორიის ორგანიზებით იმართება.
წლევანდელ კონკურსში 91 ქვეყნის ფოტოგრაფმა მიიღო მონაწილეობა და ჯამში 4200 ფოტო წარმოადგინეს. ამ ეტაპზე გამოვლინდნენ ფინალში გასული ნამუშევრები, რომელთა შორის საუკეთესოებს 24 ოქტომბერს დაასახელებენ.
