ქუთაისის ქართული კინოს ფორუმი და ახალი ქართული ფილმები
ავტორი: ნინო ჩლაიძე
16-19 ნოემბერს ქუთაისში მეორე ქართული კინოს ფორუმი ტარდება, რომელსაც ეროვნული კინოცენტრი ქუთაისის მერიასთან თანამშრომლობით წარმოადგენს.
კინოფორუმის სტუმრებს შესაძლებლობა ექნებათ ნახონ ის ქართული ფილმები, რომლებიც ახლახან დასრულდა და ჯერ ფართო ეკრანებზე არ გამოსულა. ნაჩვენები იქნება როგორც მხატვრული, დოკუმენტური და ანიმაციური ფილმები, ასევე მოკლემეტრაჟიანი ფილმების სპეციალური პროგრამა. რამდენიმე დღის განმავლობაში ქუთაისი კინომოყვარულთა ეპიცენტრად იქცევა, რადგან იქ თავს მოიყრიან ცნობილი ქართველი რეჟისორები, მსახიობები, პროდიუსერები, კინომცოდნეები და მედიის წარმომადგენლები.
კინოფორუმი 16 ნოემბერს, 18:00 საათზე, კინოთეატრ „საქართველოში“ ცნობილი ქართველი მწერლის, სცენარისტის, თეატრისა და კინოს რეჟისორის – რეზო გაბრიაძის შესახებ გადაღებული ანიმაციურ–დოკუმენტური ფილმის – “ჰარი–ჰარალე, დედაო!” ჩვენებით გაიხსნება. ფილმის ავტორი ლევან გაბრიაძეა.
ქართული კინოს ფორუმის ფარგლებში სულ 5 სრულმეტრაჟიანი ახალი ქართული ფილმი იქნება ნაჩვენები:
„აღლუმი“ (რეჟისორი – ნინო ჟვანია)
„ჰორიზონტი“ (რეჟისორი – თინათინ ყაჯრიშვილი)
„ურსუსი“ (რეჟისორი – ოთარ შამათავა)
„მეზობლები“ (რეჟისორი – გიგიშა აბაშიძე)
„სანამ მამა დაბრუნდება“ (რეჟისორი – მარი გულბიანი)
სრულმეტრაჟიანი ფილმების გარდა, ქუთაისი კინოფორუმზე დამსწრე საზოგადოებას მოკლემეტრაჟიანი ფილმების პროგრამასაც შესთავაზებს, რომელიც 17 და 18 ნოემბერს გაიმართება.
„ახალი წელი“, რეჟისორი: გიორგი სიხარულიძე
„დასასრულის დასაწყისი“, რეჟისორი: გიორგი ქასრაშვილი
„დელეგმა“, რეჟისორი: ანა კვიჭიძე
„თევზაობა“, რეჟისორი: თორნიკე ბზიავა
„კახეთის მატარებელი“, რეჟისორი: ლალი კიკნაველიძე
„მეთევზე და გოგონა“, რეჟისორი: მამუკა ტყეშელაშვილი
„ნოემბერი“, რეჟისორი: გიორგი გეთიაშვილი
“საშლელი“, რეჟისორი: დათა ფირცხალავა
„ღამის მორიგე“, რეჟისორები: გიგი ჯანაშია, ნატო გაბუნია
„ცუდი ხალხი“, რეჟისორი: გიორგი თავართქილაძე
„ცხოველი“, რეჟისორი: ამირან დოლიძე
კინოჩვენებების პარალელურად კინოკრიტიკოსებისა და კინობლოგერებისთვის ჩატარდება ვორქშოპი, რომელსაც ევროკავშირის პროგრამა – „შემოქმედებითი ევროპის წარმომადგენლობა საქართველოში“ გაუწევს ორგანიზებას. ვორქშოპს სერბი კინოკრიტიკოსი, კინოჟურნალისტი და ფესტივალის პროგრამების კოორდინატორი – ვლადან პეტკოვჩი გაუძღვება.
წელს ქართული კინო 110 წლის იუბილეს აღნიშნავს და მისი დაბადება სწორედ ქუთაისს უკავშირდება: ქუთაისელმა რეჟისორმა ვასილ ამაშუკელმა ფილმების შექმნა ბაქოში 1908 წელს დაიწყო. სამწუხაროდ ეს ფილმები შემორჩენილი არ არის, თუმცა ცნობილია მათი სათაურები და ქრონომეტრაჟი, რის გამოც ქართული კინოს ათვლის წერტილად 1908 წელი ითვლება.
მოგვიანებით, 1912 წელს, ვასილ ამაშუკელმა გადაიღო პირველი ქართული დოკუმენტური ფილმი „აკაკი წერეთლის მოგზაურობა რაჭა–ლეჩხუმში”, რომელიც ქართული კინოს საეტაპო და ერთ–ერთი ყველაზე გამორჩეული ნამუშევარია.