22 აპრილი დილიდან 

დილა მშვიდობისა!

დღეს 22 აპრილია და მსოფლიო დედამიწის დღეს აღნიშნავს. გარდა ამისა, დილიდან გაცნობებთ, რომ ქართველი ბალერინა ნინო ანანიაშვილი “ევროპა ნოსტრას” პრეზიდენტად აირჩიეს, მიშელ უელბეკს კი საფრანგეთის უმაღლესი ჯილდო, საპატიო ლეგიონის ორდენი გადასცეს. 

ნინო ანანიაშვილი “ევროპა ნოსტრას” პრეზიდენტად აირჩიეს.

“ევროპა ნოსტრა” კულტურული და ბუნებრივი მემკვიდრეობის დაცვის საზოგადოების პანევროპული ქსელია, რომელიც ევროპის 50-ზე მეტი ქვეყნიდან 250 საზოგადოებრივ ორგანიზაციას, 150 ასოცირებულ და 1500 ინდივიდუალურ წევრს აერთიანებს.

ფოტო: https://fashionnewsdelivery

მიშელ უელბეკი საფრანგეთის უმაღლესი ჯილდოთი, საპატიო ლეგიონის ორდენით დააჯილდოვეს

მწერალს  ჯილდო ელისეს სასახლეში ქვეყნის პრეზიდენტმა ემანუელ მაკრონმა გადასცა, ცერემონიას კი ექსპრეზიდენტი ნიკოლა სარკოზიც ესწრებოდა. თანამედროვე საზოგადოების მწვავე შეფასებების გამო 63 წლის მიშელ უელბეკი საფრანგეთის ერთ-ერთ გამოჩენილ ცოცხალ მწერლად ითვლება, კრიტიკოსები კი მას ქალთმოძულეობაში, რასიზმსა და ისლამოფობიაში სდებენ ბრალს.

წყარო: https://www.bbc.com

24 აპრილს Barnovi House of Arts-ში გურამ წიბახაშვილის გამოფენა გაიხსნება

გამოფენასთან ერთად გაიმართება ფოტოგრაფის წიგნის –  „ზამთარი გადატანილია“ პრეზენტაცია. გამოფენაზე წარმოდგენილი ფოტოები საქართველოს ისტორიის იმ გარდამტეხ მონაკვეთს ასახავს, რომელშიც, ერთი მხრივ, ახალდაბადებული სახელმწიფო ომს, შიმშილს და სიცივეს ებრძვის, მეორე მხრივ, კი საბჭოთა კავშირს თავდაღწეულ ქვეყანაში თანამედროვე ხელოვნება მოულოდნელად იწყებს აყვავებას.

წიგნი გურამ წიბახაშვილის 250-მდე ფოტოს, მის ისტორიებს და ანა კორძაია-სამადაშვილის ესეებს აერთიანებს და გამომცემლობა „ინდიგოსთან“ თანამშრომლობით შეიქმნა.

წყარო: https://www.facebook.com/

22 აპრილი დედამიწის დღეა

დედამიწის დღე ყოველწლიურად აღინიშნება და მსოფლიოს გარშემო უამრავ გარემოს დაცვის მხარდამჭერ ღონისძიებასა თუ აქციას აერთიანებს. დედამიწის დღე პირველად 1970 წელს აღინიშნა, დღესდღეობით კი მსოფლიო მასშტაბითაა კოორდინირებული და ყოველწლიურად  193-ზე მეტ ქვეყანაში აღინიშნება.

2016 წელს დედამიწის დღეზე ამერიკის შეერთებულმა შტატებმა, ჩინეთმა და კიდევ 120 ქვეყანამ ხელი მოაწერეს ისტორიული მნიშვნელობის მქონე „პარიზის შეთანხმებას“ კლიმატის დაცვის შესახებ. დედამიწის დღე ტრადიციულად ერთი კვირა გრძელდება და გარემოს იმ პრობლემებს ეხება, რის წინაშეც მსოფლიო დგას.

ასტრონომებმა სამყაროს პირველი მოლეკულა დააფიქსირეს

პირველი მოლეკულა ჰელიუმის ჰიდრიდია. აღნიშნული მოლეკულა ასტრონომებმა დედამიწიდან ათასი სინათლის წლის სიშორეზე აღმოაჩინეს. ამისათვის მათ ნასას მიერ მოდიფიცირებული ბოინგ 747, ზედმეტსახელად SOFIA გამოიყენეს, რომელშიც ინფრაწითელი ობსერვატორიაა მოთავსებული.

წყარო: https://www.sciencemag.org/

ინსტაგრამში შესაძლოა პოსტებზე ლაიქების რაოდენობა აღარ გამოჩნდეს

ამის მიზეზად კომპანია ხალხის ყურადღების ლაიქების რაოდენობიდან პოსტის შინაარსზე გადატანას ასახელებს. ლაიქების რაოდენობის ნახვას მხოლოდ პოსტის ავტორი შეძლებს. ამ ეტაპზე უცნობია, საბოლოოდ დაინერგება თუ ეს სიახლე.

წყარო: https://www.theverge.coms

ნეტფლიქსმა ბიონსეს 60-მილიონიანი კონტრაქტი გაუფორმა

ერთ-ერთი პროექტი, რომელშიც მომღერალს $20 მილიონს გადაუხდიან, ეს არის დოკუმენტური ფილმი Coachella, რომელშიც 2018 წელს მომღერლის კულისებს მიღმა ცხოვრებაა აღწერილი. გარდა ამისა, სტრიმინგ-სერვისმა ცოტა ხნის წინ ბიონსეს შესახებ დოკუმენტური ფილმი განათავსა.  პროექტის დანარჩენი დეტალები უცნობია.

წყარო: https://variety.com/

არასრულწლოვანის გაუპატიურებაში ბრალდებული, რეჟისორი რომან პოლანსკი ამერიკის კინოაკადემიაში წევრის სტატუსის აღდგენას სასამართლოს გზით ითხოვს

როგორც ცნობილია, რეჟისორის ადვოკატები შესაბამისი შუამდგომლობით ლოს-ანჯელესის სასამართლოს მიმართავენ. სტატუსის დაბრუნების თხოვნით კინოაკადემიას პოლანსკიმ იანვარში მიმართა, თუმცა უარი მიიღო. გაუპატიურებაში ბრალდების გამო რეჟისორი რომან პოლანსკი ამერიკის კინოაკადემიიდან 2018 წლის მაისში გარიცხეს.  პოლანსკის არასრულწლოვანი მოდელის, 13 წლის სამანტა გეიმერის გაუპატიურებას ედავებიან. სავარაუდო დანაშაული 40 წლის წინ, 1977 წელსაა ჩადენილი.

წყარო: https://www.apnews.com/

დემი მური ყოფილ ქმრებზე წიგნს დაწერს

მსახიობი მემუარებში სახელწოდებით Inside Out ყოფილ ქმრებზე მოუთხრობს მკითხველს, რითაც მურის გულშემატკივარი მისი პირადი ცხოვრების შესახებ კიდევ უფრო მეტ დეტალს შეიტყობს. წიგნში მთავარი აქცენტი ბრიუს უილისისა და ეშტონ კატჩერის შესახებ გაკეთდება.

წყარო: https://www.eonline.com/