“ქოლგა თბილისი ფოტოს” კვირეულის გახსნის ცერემონია 3 მაისს გაიმართება

საერთაშორისო ფოტოკონკურსის, “ქოლგა თბილისი ფოტო” 2019-ის საგამოფენო კვირეული და გრანდიოზული დაჯილდოების ცერემონია თბილისში 3 მაისს გაიმართება.

ფოტოკონკურსის დაარსების მიზანია საერთაშორისო და ქართული ფოტოგრაფიის ერთმანეთთან დაახლოება.

სწორედ ამიტომ, კონკურსში უცხოელი ფოტოგრაფებიც მონაწილეობენ. გამარჯვებულები გამოვლინდებიან შემდეგ ნომინაციებში: დოკუმენტური სერია, რეპორტაჟი, კონცეპტუალური ფოტოპროექტი, საუკეთესო კადრი, საუკეთესო პორტრეტი, მობილური ფოტოსესია.

ორგანიზატორების თქმით, წლევანდელი დაჯილდოების ცერემონია და საგამოფენო კვირეულიც განსაკუთრებული იქნება, რადგან ჩვენს დედაქალაქში ისეთი დონის ფოტოგრაფების ნამუშევრების ნახვის შესაძლებლობა გვექნება, როგორებიც არიან მარკ რიბუ და იონას ბენდიქსენი.

საგამოფენო კვირეულის ფარგლებში ჩატარდება ასევე  World Press Photo-ს წლევანდელი გამარჯვებულის, სანე დე ვილდეს და ფოტოგრაფ ბენედიქტე კურზენის ჯგუფური გამოფენაც Tales of Island.

20 სხვადასხვა საერთაშორისო თუ ადგილობრივ გამოფენაზე ნაჩვენები იქნება როგორც ისტორიულად მნიშვნელოვანი, ასევე თანამედროვე ფოტოგრაფიის გამორჩეულად საინტერესო ნიმუშები.

ფოტოექსპერტები და პროფესიონალი ფოტოგრაფები “ქოლგა თბილისი ფოტოს” ფარგლებში სემინარებს, უფასო ვორქშოფებს და პორტფოლიოების განხილვებსაც გამართავენ.

როგორც ყოველთვის, გამარჯვებულ ფოტოებს წელსაც საერთაშორისო ჟიური გამოავლენს.