Women Who Draw – ვებპლატფორმა ილუსტრატორი ქალებისა და სხვა “ნაკლებად შესამჩნევი” ჯგუფებისთვის
ვებპლატფორმის – Women Who Draw-ის დაარსების იდეა ჯულია როტმანს სპონტანურად, ცნობილი ჟურნალების ფურცვლისას გაუჩნდა. მან აღმოაჩინა, რომ გამოცემებისთვის შექმნილი ილუსტრაციების ავტორთა უმეტესობა კაცები იყვნენ.
იმისათვის რომ ნიჭიერი ქალი-ილუსტრატორების „ხილვადობა“ გაეზარდა, მეგობართან – უენდი მაკნოტონთან ერთად შეიმუშავა ონლაიან-კატალოგი. მათი თქმით, პლატფორმა ერთგვარი ჰაბი უნდა ყოფილიყო, სადაც სხვადასხვა ქვეყანაში მცხოვრები არტისტი ქალები, LGBT თემისა და ასევე სხვა, ნაკლებად „შესამჩნევი” ჯგუფების წარმომადგენლები თავიანთ პროფილებსა და ნამუშევრებს ატვირთავდნენ, ცნობილი გამოცემების არტ-დირექტორებს კი, სასურველი ხელწერისა და სტილის მხატვრების პოვნის დიდი არჩევანი ექნებოდათ.
- ავტორი: ალექსანდრა ბოუმანი
- ავტორი: ელი ჯი იანგი
- ავტორი: ელის იანგი
2017 წლის დეკემბერში, როდესაც ვებგვერდი Women Who Draw ამუშავდა, რამდენიმე საათში “დაეკიდა”, რადგან ატვირთული მასალის რაოდენობას ვერ გაუმკლავდა. ხარვეზების აღმოფხვრის შემდეგ, რამდენიმე დღეში, საიტმა 6 მილიონი ნახვა დააგროვა, ხოლო 1200-ზე მეტმა მომხმარებელმა თავიანთი ნამუშევრები გამოაგზავნა. „დაარსებიდან ორი წლისთავზე, კატალოგი რამდენიმე ათას ილუსტრატორ ქალს აერთიანებს. საიტის დახმარებით, ბევრი მათგანი პირველად იღებს შეკვეთებს გამოცემებისა და არტ-დირექტორებისგან, პირველად საქმდება, რაც ჩვენი მთავარი მიზანია“, – ამბობენ დამფუძნებლები.
- ავტორი: ფენი რუისი
- ავტორი: კელსი როუტენი
- ავტორი: დაიანა რუიზი
- ავტორი: დანაჰ კიმი
გარდა პოტენციურ დამკვეთებთან ურთიერთობის შესაძლებლობისა, Women Who Draw-ს ერთგვარი საგანმანათლებლო-შემეცნებითი ფუნქციებიც აქვს. პერიოდულად ქვეყნდება ინტერვიუები ინდუსტრიის პროფესიონალებთან, სხვადასხვა ცნობილი გამოცემების რედაქტორებთან და სამხატვრო ხელმძღვანელებთან, რომლებიც დარგში არსებულ ტრენდებზე, გამოწვევებსა და საჭიროებებზე საუბრობენ.
- ავტორი: სარა კრჟიჟეკი
- ავტორი: ანჯინი მაქსველი
Women Who Draw-ზე გათვალისწინებულია ურთიერთობა სოციალური ქსელებისა და პირდაპირი ტრანსლაციების მეშვეობით, რაც მომხმარებლებს ერთმანეთთან დიალოგისა და გამოცდილების გაზიარების შესაძლებლობას აძლევს.
Women Who Draw-ზე გაწევრებულ მომხმარებლებთან ხშირად თანამშრომლობენ: The New York Times, TED, The Globe, Bust Magazine და Bitch Magazine.