2021 წლის ოსკარის ცერემონია ორი თვით გადაიდო

ამერიკის კინოაკადემიის გადაწყვეტილებით, ოსკარის დაჯილდოების ცერემონია, რომელიც ტრადიციულად თებერვლის ბოლოს იმართებოდა ხოლმე, პანდემიის გამო 2021 წლის აპრილში ჩატარდება. 

კინოაკადემიაში ამბობენ, რომ ერთ-ერთი მთავარი მიზეზი ჩაშლილი პრემიერებია, რომელთა ეკრანზე გამოსვლაც  ახალი  კორონავირუსის გამო ვერ მოხერხდა.  

“ოსკარის ცერემონია 2021 წლის 25 აპრილს ჩატარდება. ნომინაციებს კი 2021 წლის 15 მარტს გამოვაცხადებთ”, – ნათქვამია ამერიკის კინოაკადემიის განცხადებაში.

92-წლიანი არსებობის მანძილზე  ოსკარის ცერემონია სულ სამჯერ გადაიდო: პირველად 1938 წელს, როცა ლოს-ანჯელესი  წყალდიდობის დროს დაიტბორა, მეორედ 1968 წელს, როდესაც მარტინ ლუთერ კინგი მოკლეს და 1981 წელს, როდესაც პრეზიდენტ რონალდ რეიგანის მოკვლა სცადეს.