ჯონ ტრავოლტას მეუღლე, კელი პრესტონი 57 წლის ასაკში გარდაიცვალა
ჯონ ტრავოლტას მეუღლე, მსახიობი კელი პრესტონი 57 წლის ასაკში მკერდის სიმსივნით გარდაიცვალა. ინფორმაცია პრესტონის გარდაცვალების შესახებ ჯონ ტრავოლტამ ინსტაგრამისა და ფეისბუქის ოფიციალურ გვერდებზე გაავრცელა.
ტრავოლტას თქმით, მის ცოლი ბოლო რამდენიმე წლის განმავლობაში გმირულად ებრძოდა ვერაგ დაავადებას, თუმცა, სამწუხაროდ, დამარცხდა. მსახიობმა მხარდაჭერისთვის მადლობა გადაუხადა ცოლის ექიმებსა და მეგობრებს.
“დამძიმებული გულით გაცნობებთ, რომ ჩემმა მშვენიერმა ცოლმა, კელიმ, მკერდის სიმსივნესთან 2-წლიანი ბრძოლა წააგო. ამდენი ადამიანის სიყვარულითა და მხარდაჭერით მან მამაცურად იბრძოლა. მე და ჩემი ოჯახი ყოველთვის მადლიერები ვიქნებით მისი ექიმებისა და ექთნების, ყველა სამედიცინო ცენტრის, რომელიც დაგვეხმარა, ისევე, როგორც ბევრი მეგობრისა და საყვარელი ადამიანის, რომლებიც მის გვერდით იყვნენ.
კელის სიყვარული და სიცოცხლე ყოველთვის გვემახსოვრება. ცოტა დრო დამჭირდება, რათა ჩემი შვილების გვერდით ვიყო, რომელთაც დედა დაკარგეს, ამიტომაც, მაპატიეთ, თუკი ჩემგან ცოტა ხანს ვერაფერს გაიგებთ”. – წერს ტრავოლტა ინსტაგრამზე.
40-წლიანი კარიერის განმავლობაში კელი პრესტონმა 72-ზე მეტ ფილმსა და სატელევიზიო სერიალში ითამაშა. მათ შორის ისეთ ცნობილ კინოსურათებში, როგორებიცაა: Twins, Jerry Maguire, Holy Man და ა.შ
ტრავოლტამ და კელიმ 1991 წელს იქორწინეს. მათი 3 შვილიდან ერთ-ერთი, ჯეთი, 2009 წელს გარდაიცვალა.