ლედი გაგას ახალი კლიპი სერგო ფარაჯანოვის ფილმების მოტივებზეა აგებული
სულ ცოტა ხნის წინ სუპერპოპულარულმა ამერიკელმა მომღერალმა, ოსკარის, ოქროს გლობუსისა და გრემის მფლობელმა ლედი გაგამ ახალ სიმღერაზე „911“ გადაღებული კლიპი გაავრცელა.
როგორც თავად მომღერალი ამბობს, სიმღერაც და კლიპიც მისთვის ძალიან მნიშვნელოვანი და პირადულია.
ლედი გაგა „911-ს“ მოკლემეტრაჟიან ფილმად მოიხსენიებს და ამბობს, რომ მასში ის გამოცდილებაა ასახული, რაც მას ფსიქიკური ჯანმრთელობის გარშემო დაუგროვდა.
საკულტო მომღერალი ინსტაგრამის ოფიციალურ გვერდზე წერს, რომ კლიპში ნაჩვენებია, თუ როგორ შეუძლია ადამიანის გონებას რეალური და გამოგონილი გმირებისა თუ მოვლენების ერთმანეთთან დაკავშირება.
მნიშვნელოვანია ის, რომ მასში ლეგენდარული რეჟისორის, სერგო ფარაჯანოვის ფილმების მოტივებია გამოყენებული. კლიპის ბოლოს კი ვხედავთ ფარაჯანოვის ორი ფილმის – „ბროწეულის ფერის“, რომელზეც სოფიკო ჭიაურელია გამოსახული, და „აშიკ-ქერიბის“ პოსტერებსაც.
ორივე ფილმი სერგო ფარაჯანოვის შემოქმედებაში უმნიშვნელოვანეს ნამუშევრად ითვლება და მსოფლიო კინემატოგრაფში გამორჩეულ ადგილს იკავებს.