“ლოტო – იგავი ზღვისპირა ქალაქზე“ — ზაზა ხალვაშის ბოლო ფილმი

ზაზა ხალვაშის უკანასკნელი ფილმი ერთ იტალიურ ეზოზე გვიყვება, რომლის მცხოვრებლების ბიოგრაფიები და ისტორიები ისევეა ერთმანეთში გადაჯაჭვული, როგორც კარგად ნაცნობი თბილისური იტალიური ეზოს არქიტექტურა.

“ეს არის შავ-თეთრი ფილმი ფერად ისტორიებზე“. –  ზაზა ხალვაში

ფილმის პროდიუსერია თეკლა მაჭავარიანი. ოპერატორი კი გიორგი შველიძე. “ყველა სცენაში შევეცადეთ, რომ სხვადასხვა ფორმებით გვეთამაშა — ერთი სცენა გადაგვეღო სტატიკა, მეორე სცენა გადაგვეღო ხელით, მესამე სცენა გადაგვეღო ურიკით და ა.შ.” ამბობს გიორგი საქართველოს ეროვნული კინოცენტრის მიერ მომზადებულ ვიდეოში.

“ლოტო – იგავი ზღვისპირა ქალაქზე“ ცნობილი ქართველი რეჟისორის, ზაზა ხალვაშის ბოლო ნამუშევარია – რეჟისორი ფილმზე მუშაობის დასრულებამდე გარდაიცვალა. სამწუხაროდ, შემოქმედებით გუნდს, მეგობრებსა და ოჯახს ერთ-ერთი როლის შემსრულებელი, ზურაბ ქავთარაძეც დააკლდა. 

ვიდეოში, რომელსაც საქართველოს ეროვნული კინოცენტრი ავრცელებს, შეგიძლიათ ნახოთ საინტერესო კადრები ფილმის გადასაღები მოედნიდან:

“ფილმის გადაღებები 2019 წლის ოქტომბერში ქალაქ ბათუმში დაიწყო. ვინაიდან ფილმი იტალიური ეზოს მცხოვრებლებზეა, რომელთა ისტორიებიც ერთმანეთს კვეთს, ამბავს არ ჰყავს მთავარი გმირი, ყველა პერსონაჟი ერთნაირად მნიშვნელოვანია“, – ამბობს ზაზა ხალვაშის შვილი, სალომე ხალვაში AT.ge-სთან.