ელენე ნავერიანის ფილმმა კანადაში გამართულ ფესტივალზე 2 ჯილდო მიიღო
რეჟისორ ელენე ნავერიანის ფილმი “სველი ქვიშა” აგრძელებს საფესტივალო ცხოვრებას – ჩვენმა მკითხველმა უკვე იცის, რომ წლეულს, აგვისტოში ფილმი ლოკარნოს კინოფესტივალზე უჩვენეს, სადაც საუკეთესო მსახიობ მამაკაცად ქართველი გია აგუმავა დაასახელეს ამავე ფილმში შესრულებული როლისთვის.
კინოსურათმა ამჯერად კანადაში გამართულ ფესტივალზე – Image+Nation ორი ჯილდო მიიღო.
ბებე სესიტაშვილი საუკეთესო მსახიობად დაასახელეს, მეორე ჯილდო კი ფილმის რეჟისორს, ელენე ნავერიანს გადასცეს.
Image+Nation ყოველწლიური საერთაშორისო კინოფესტივალია, რომლის ფოკუსშიც LGBTQ+ თემი და მათი ცხოვრებაა მოქცეული.
ფესტივალი პირველად 1987 წელს ჩატარდა და მას შემდეგ მუდმივად ცდილობს საზოგადოებას ქვიარ ადამიანების საინტერესო ისტორიები გაუზიაროს.
შეგახსენებთ, რომ “სველი ქვიშა“ ქართულ-შვეიცარიული პროექტია, რომელშიც მთავარ როლებს გია აგუნავა, ბებე სესიტაშვილი, მეგი კობახიძე, გიორგი წერეთელი, კახა კობალაძე, ეკა ჩავლეიშვილი და ზაალ გოგუაძე ასრულებენ.
ფილმის სიუჟეტი კი შავი ზღვის სანაპიროზე, ერთ-ერთ სოფელში ვითარდება, სადაც ახალგაზრდა ქალი, მოე, ბაბუის თვითმკვლელობის შემდეგ ძველი სიყვარულის ისტორიას უბრუნდება და გაიგებს, რომ მის ირგვლივ ბევრი ტყუილია.