რომელი წიგნი შევიძინოთ ფესტივალზე – რეკომენდაციები

ავტორი: თამარ ჭინჭარაული

თბილისის წიგნის  24-ე საერთაშორისო ფესტივალი დიდ დღესასწაულთან ერთად დიდი თავსატეხიც არის ხოლმე წიგნის მოყვარულებისთვის. სპეციალურად საფესტივალო დღეებისთვის ფასდაკლებული წიგნები დიდი საცდურია იმისთვის, რომ ყველა მათგანის შეძენა მოგვინდეს და სწორედ აქ იწყება მთავარი დილემა – რომელი წიგნი, ან წიგნები შევიძინო უამრავი სასურველიდან. ამიტომ გადავწყვიტეთ, რამდენიმე განსხვავებული პროფესიის, გემოვნებისა და ცხოვრებისეული გამოცდილების ადამიანისთვის გვეკითხა აზრი იმ ერთ წიგნთან დაკავშირებით, რომელიც აუცილებლად უნდა შევიძინოთ ფესტივალზე. მაშ ასე, ნახეთ მწერლების, პოეტების, მსახიობების, მუსიკოსების, მთარგმნელებისა და ჟურნალისტების მიმოხილვა და რჩევები.

მებო ნუცუბიძე

მუსიკოსი, ტელეწამყვანი

წიგნის ფესტივალი ძალიან მნიშვნელოვანი მოვლენაა ჩემთვის.  ტრადიციაა ფესტივალზე წასვლა და ახალი წიგნებისა თუ ავტორების გაცნობა. ყოველ წელს განსაკუთრებული მოლოდინი მაქვს ხოლმე და წელსაც ბევრ ახალ წიგნს ველოდები, თუმცა რახან ერთი უნდა გამოვყო, ეს იქნება სტედმენის “სკანდარი და ცალრქის ქურდი”.

მიუხედავად იმისა, რომ წიგნი ჯერ არ წამიკითხავს და მის ლიტერატურულ ღირებულებაზე არაფერი ვიცი, რადგანაც ერთი გმირის გარშემო განვითარებული მრავალწიგნიანი ამბების მოყვარული ვარ, ამ წიგნსაც განსაკუთრებულად ველი და ვფიქრობ, ისეთივე საინტერესო იქნება, როგორც ჩემი ბავშვობის საყვარელი წიგნების სერია “ჰარი პოტერი”. რა თქმა უნდა, “ჰარი პოტერი: ბავშვობაში შემიყვარდა და ძალიან რთული იქნება იმდროინდელი ემოციები ხელახლა განმაცდევინოს სხვა წიგნმა, თუმცა, თუ ახლაც გამოჩნდება გმირი, რომლის შესახებაც ისტორიები საინტერესოდ განვითარდება და წიგნიდან წიგნამდე მოლოდინს გაგვიჩენს, ვფიქრობ, ეს ძალიან საინტერესო ლიტერატურული მოგზაურობა იქნება.  ასე რომ, მიეცით შანსი ამ წიგნს – “სკანდარი და ცალრქის ქურდი”.

დერილ ფერნანდეზი

ლიტერატურის მასწავლებელი

თბილისის წიგნის ფესტივალზე საუბარი და საყვარელი წიგნების სხვისთვის გაზიარება ყოველთვის სასიამოვნოა. მკითხველს ვურჩევ, ფესტივალზე მოძებნოს ჯეკ კერუაკის წიგნი „გზაზე“.

ეს არის მეოცე საუკუნის ერთ-ერთი უდიდესი ამერიკული კლასიკა. 1951 წელს კერუაკმა მთელი წიგნი საბეჭდ მანქანაზე აკრეფის პარალელურად დაწერა სულ რაღაც სამ კვირაში და სამუდამოდ შეცვალა ამერიკული კულტურა. წიგნმა გავლენა მოახდინა ყველაზე, ბობ დილანიდან ჯონი დეპამდე. წერის სტილი ჰგავს ჯაზის მუსიკის ქაღალდზე აღბეჭდვას. ეს არის ამბავი საკუთარი სამშობლოში მოგზაურობის შესახებ, რითაც მთავარი გმირი საკუთარი თავის პოვნას ცდილობს. 

ანი ვაშაგაშვილი

ჟურნალისტი

ერთდროულად დიდი პატივი და პასუხისმგებლობაა, ვინმეს ურჩიო, თუ რომელი წიგნი  შეიძინოს ამ მშვენიერ  წიგნის ზეიმზე. თანაც მაშინ, თუ ეს წიგნი მაინცდამაინც  ერთი უნდა იყოს… და მაინც, თუ ამ არჩევანის წინაშე უნდა დავდგე, ვიფიქრე და გადავწყვიტე, რომ ეს ერთი  ავტორი  აუცილებლად ქართველი  იყოს.

არანაირად არ ვაკნინებ და ძალიან მიყვარს კარგი თარგმანები, მაგრამ მშობლიურ ენაზე დაწერილ ტექსტს ჩემთვის განსაკუთრებული მნიშვნელობა აქვს, განსაკუთრებულად ვგრძნობ ტექსტის ტემპს, ხასიათს, სუნს და გემოსაც კი:) სწორედ ასეთი  ტექსტი აღმოჩნდა სულ ბოლოს წაკითხული ზაზა ბურჭულაძის “ვარდის სურნელი”. დღევანდელობასავით სევდიანი, მელანქოლიური, ზუსტი, შეულამაზებელი და სასტიკი რეალობა და თან ასეთი პოეტური ფურცელზე გადატანილი დიდი ხანია არაფერი წამიკითხავს. რა დროს პოეზიააო ფიქრობ და სწორედ ამ დროს ისე მოგეპარება გალაკტიონი, რომ პირდაპირ სუფთა ჰაერს გაგრძნობინებს. პოეზიის და სისასტიკის ეს სინთეზი უცნაურ და შთამბეჭდავ გავლენას ახდენს. ეს არის ტექსტი, რომელიც სხვა ქვეყნის მიწაზე მყოფი მწერლის ცინიკურ და თვითირონიით სავსე რუტინულ სამყაროში გამოგზაურებს, სადაც იმდენი სევდა და სიყვარულია, რამდენიც მისივე წიგნში გამქრალი და გაუჩინარებული ბავშვები.

რომ ვკითხულობდი, მეგობარმა მკითხა, კარგი წიგნიაო? ვუპასუხე, სასიამოვნო არა, მაგრამ უდავოდ კარგი წიგნია-მეთქი.

ესეც ჩემი ერთი წიგნის რეკომენდაცია, თქვენ კი მაინც ბევრი წიგნის ყიდვას გირჩევთ.

გიორგი შარვაშიძე

მსახიობი, ტელეწამყვანი

თემო რეხვიაშვილის “კურიერის ამბებს” როცა კითხულობ, ისეთი შეგრძნება გაქვს, თითქოს ვიღაც უცნობი ადამიანი შენს ისტორიას გიყვება.

თუ როგორ აღგიქვამს საზოგადოება და სახელმწიფო – ამაზეა დამოკიდებული შენი პიროვნული თუ პროფესიული ზრდა და როგორ შეიძლება გაექცე ამ წნეხს და აღმოჩნდე შენივე შექმნილ რეალობაში ისე, რომ დარჩე ადამიანად – აი, ეს არის მთავარი იდეა. სწორედ ამიტომ უნდა წაიკითხო ეს წიგნი!

დიანა ანფიმიადი

პოეტი

როგორც წესი, მსგავს სიებში პოეზიას ნაკლები ადგილი უჭირავს ხოლმე, ამიტომ ჩემი და ასია დარბინიანის მიერ ქართულ ენაზე ნათარგმნ სომხური პოეზიის ანთოლოგიის შეძენას გირჩევთ.

არა იმიტომ, რომ ჩემი წვლილიცაა ამ კრებულის თარგმნაში, არამედ იმიტომ, რომ ობიექტურად ძალიან საინტერესო კრებულია. მათთვის, ვისაც აინტერესებს რა ხდება ჩვენს მეზობლად, როგორი საინტერესო და ერთმანეთისგან განსხვავებული ავტორები ჰყავთ სომხეთში, რას ფიქრობენ ჩვენ გვერდით და რაზე საუბრობენ პოეტები, მგონია, რომ კარგი შენაძენი იქნება.

ალექსანდრე ლორთქიფანიძე

მწერალი, მსახიობი, ტელეწამყვანი 

წიგნის ფესტივალი ის ადგილია, სადაც ყველაზე დიდ დროს და ბევრ ფულს ვხარჯავ ხოლმე, თუმცა მე მინდა თანამედროვე ქართულ ლიტერატურას მივცე მეტი გასაქანი და სხვა ბევრ წიგნს შორის, ერთ წიგნზე გავამახვილო ყურადღება. ესაა დებიუტანტი ქართველი ავტორის, გიორგი ხარაიშვილის რომანი “ბნელია გზა”, დაპირებული სერიიდან “პირველყოფილი წყვდიადი”.

ქართული ფენტეზით ნამდვილად არ ვართ განებივრებული, ეს წიგნი კი ფენტეზის მოყვარულებს ნამდვილად დააინტერესებთ როგორც ეპიკური ისტორიით, გამართული სამყაროთი და კარგად აგებული პერსონაჟებით, ისე ავტორის მცდელობით, შექმნას ფენტეზის ქართული ენა, გაიაროს ბეწვის ხიდზე ყოფასა და პათეტიკას შორის და იპოვოს ის ზუსტი სიტყვები, რომლითაც რომანი არც ფენტეზისთვის დამახასიათებელ ზღაპრულობას დაკარგავს და არც არქაიზმებში გადაიჭრება. მიეცით შანსი ქართულ ფენტეზის.

.