სიცილი სიცილისთვის და მწუხარება სიცრუისთვის – ნესტან აბდუშელიშვილის გამოფენა ობსკურაში

საგამოფენო სივრცე “ობსკურაში” ხელოვანმა ნესტან აბდუშელიშვილმა სოლო შოუ “სიცილი სიცილისთვის და მწუხარება სიცრუისთვის” წარადგინა.

ამ შემთხვევაში, ის აქცენტს აკეთებს პროცესზე, უარს ამბობს საგნის საწყის ფუნქციაზე და გვთავაზობს მისი წაკითხვის თავისებურ გზას. იგი ცდილობს მატერიალური ობიექტი გარდაქმნას არამატერიალურ კავშირად წარსულსა და აწმყოს შორის და შესაბამისად შექმნას დოკუმენტი მომავალი მეხსიერებისთვის.

ავტორი იმ უბრალო ობიექტებს აკვირდება, რომლის გარემოცვაშიც ცხოვრობს და რომლებიც, მიუხედავად იმისა, რომ ყოველდღიურ კავშირში არ არიან, მისთვის ერთგვარ მნიშვნელობას იძენენ. ხელოვანი ამავდროულად როგორც კოლექტორი, ნივთებს თითქოსდა ფოტოგრაფიის მთავარი პრინციპის, ‘decisive moment’- ის საწინააღმდეგოდ, ეფემერულობისა და სპონტანურობის განცდის გარეშე აღბეჭდავს.

მიუხედავად იმისა რომ ნამუშევრებში კონკრეტული ობიექტები, ან ამ ობიექტების დეტალებია გამოსახული, დროის და ადგილის უქონლობა, მნახველისთვის ინტერპრეტაციის მეტ სივრცეს ტოვებს და ორ ადამიანს შორის კავშირის გაღრმავების ახალ გზას გვთავაზობს.