სპორტფესტი – პირველი ქართული სპორტული ფესტივალი საქართველოში
2023 წლის 20-21 მაისს (12:00 საათიდან 21:00 საათამდე) ექსპო ჯორჯიას მე-11 პავილიონში პირველი ქართული სპორტული ფესტივალი – სპორტფესტი ჩატარდება.
სპორტის სხვადასხვა სახეობის ზონები, სპორტ-არენა, სპიკერები, საბავშვო და კვების ზონები, სპორტული ფედერაციები, სკოლები, კლუბები, სავარჯიშო დარბაზები, მაღაზიები, უამრავი გასართობი აქტივობა და სიურპრიზები – ეს ყველაფერი არ არის, რაც ფესტივალზე მისულ სტუმრებს ელოდებათ.
სპორტფესტზე წარმოდგენილი იქნება სპორტის არაერთი სახეობა – ფეხბურთი, ბეისბოლი, გოჯუ რიუ, ჯიუჯიცუ, რაგბი, ტექბოლი, ავტო-სპორტი, მთის სპორტი, ველო-სპორტი და სხვა.
„ფესტივალის მიზანია ადამიანები დაახლოოს სპორტის სხვადასხვა დისციპლინებთან და თავად სპორტსმენებთანაც, რომლებისთვისაც სპორტი ყოველდღიურობის ნაწილია. ეს მათთვის იქნება კარგი ბიძგი ჩაერთონ ჯანსაღი ცხოვრების წესის დამკვიდრებაში – ბავშვებისთვის, მოზარდებისა თუ უფროსი ადამიანებისთვის თანაბრად მნიშვნელოვანია ამ კუთხით მეტი ინფორმაციის მიღება. თანაც, სპორტსმენების უპირატესობაა ის, რომ უკეთ გვიჩვენებენ სპორტის კარგ მხარეებს. კარგია ისიც, რომ მხოლოდ პროფესიულ სპორტზე არ ვსაუბრობთ – სტუმრებს ელოდებათ დასვენება, გართობა, რეკრეაცია… მოკლედ, აქ მრავალფეროვან და ჯანსაღ უქმეებს გაატარებენ“, – ამბობს AT.ge-სთან სპორტფესტის ორგანიზატორი რეზი პეტრიაშვილი.
აღსანიშნავია, რომ ფესტივალს სხვადასხვა ცნობილი სპორტსმენიც დაესწრება და ისინი მონაწილეებს უგულშემატკივრებენ. სპორტფესტის მიზანია, რაც შეიძლება მეტი ადამიანი დაინტერესდეს სპორტითა და ცხოვრების ჯანსაღი წესით.