Kiosk RuLeTa – ექსპერიმენტული მუსიკა „ჰარაკის“ სივრცეში
ავტორი: თეონა ჯაფარიძე
მუსიკა პირდაპირ ევროპის გულიდან – ციურიხიდან უკვე თბილისშია და 9 და 10 ივნისს თქვენ მას მოუსმენთ, ნახავთ და შეიგრძნობთ თეატრ „ჰარაკის“ სივრცეში. (ღვინის ქარხნის ტერიტორიაზე, მელიქიშვილზე).
Kiosk RuLeTa ექსპერიმენტულ, ნეო-კლასიკურ მუსიკაზე ორიენტირებული პროექტია, რომელსაც პიანისტი თამრიკო კორძაია, მომღერალი ლენა ქიფენჰოიერი, კომპოზიტორი და მომღერალი რუსუდან მეიფარიანი და სცენოგრაფი სოფი კრაიერი წარმოადგენენ. ევროპაში სეზონის ბოლო შოუ მათ 3 ივნისს გერმანია-შვეიცარიის საზღვართან – ვინტერტურში გამართეს და იქვე დააანონსეს, რომ შემდეგი გაჩერება თბილისია და აი, ისინი დღეს უკვე აქ არიან.
თბილისურ სცენაზე მათ შეუერთდებიან ახალი თაობის ქართველი კომპოზიტორები და ელექტრონული მუსიკის არტისტები – Halfie (ანუშკა ჩხეიძე, საქართველო) და Kordz (ალექსანდრე კორძაია, საქართველო/შვეიცარია). ისინი წარმოადგენენ ახალ კომპოზიციებს სპეციალურად Kiosk RuLeTa-სთვის.
კონცერტზე წარმოდგენილი იქნება რუსუდან მეიფარიანის 4 კომპოზიცია, რომლებიც მან შექმნა და გადააკეთა სპეციალურად Kiosk RuLeTa -სთვის. ასევე შესრულდება მაურიციო კაგელის, ჩარლზ აივისის, ლუდვიგ ვან ბეთჰოვენის ნაწარმოებები და არამხოლოდ…
სოფი კრეიერი კი თავისი სცენოგრაფიული ინტერვენციებით ამ მუსიკას განსაკუთრებულ ატმოსფეროს შეუქმნის.
ასე რომ, ექსპერიმენტული ნეო-კლასიკის მოყვარულებს ნამდვილი დღესასწაული გელით.
Kiosk RuLeTa-ს კონცეფცია და ფილოსოფია დაფუძნებულია პოსტსაბჭოთა მუსიკალური კიოსკის (“ბუტკის”) ფენომენზე, სადაც შეგეძლოთ გეპოვათ ყველაფერი: – დაწყებული საკვებიდან, ხილიდან და ბოსტნეულიდან, დამთავრებული – ჩინურ ფეიკ “ფუფუნების ნივთებამდე“ თუ იშვიათ ანტიკვარამდე. Kiosk RuLeTa-ს მუსიკაც ზუსტად ასეთია და ის იქმნება ინტერფეისში კლასიკური, ექსპერიმენტული, პოპ-მუსიკის იმპროვიზაციით, პიანინოს, ჰარმონიუმის, სათამაშო პიანინოს, სინთეზატორებისა და ხმების გამოყენებით. მათ რეპერტუარში შედის მუსიკა მონტევერდიდან, პერსელიდან, ტერი რაილიდან და იანაჩეკიდან დაწყებული – თანამედროვეობამდე – ალექსანდრე კორძაიასა და რუსუდან მეიფარიანის ორიგინალური კომპოზიციებით დასრულებული.
– „მუსიკის ასეთი არჩევანი ველურ პოპურის წააგავს. ეს ნაჭრებია, რომელსაც კიოსკში ვირჩევთ – მაცთუნებელს, ბავშვურს, მხიარულსა და უცნაურს. ეს მობილური კიოსკია, რომელიც განასახიერებს ლტოლვას პირდაპირობისთვის, სიმარტივისთვის, მხიარულებისთვის.“ – აღნიშნავენ პროექტის კონცეფციაში.
Kiosk RuLeTa-ს მოხეტიალე თეატრივით შეუძლია მოულოდნელად, ყველგან და ნებისმიერ დროს ჯადოსნური ატმოსფერო შექმნას ერთდროულად მუსიკითა და ვიზუალურად მარტივი საშუალებებით. ამიტომ, აუცილებლად უნდა მოვუსმინოთ /ვნახოთ, რა მოხდება „ჰარაკის“ სცენაზე 9 და 10 ივნისს.
AT.ge მოუთმენლად ელის მათთან შეხვედრას…