რეალობად ქცეული „თამაში“ – მექანიკოსი „თეგეტა მოტორსიდან“
ყველაფერი სათამაშო მანქანებით დაიწყო. პატარა გოგო ავტომობილებით გატაცებით თამაშობდა და, ასაკის მატებასთან ერთად, ეს „თამაში“ სულ უფრო და უფრო საინტერესოდ ეჩვენებოდა. ლიკა მაისურაძე დღეს „თეგეტა მოტორსის“ ერთ-ერთი ფილიალის მთავარი მექანიკოსია.
ლიკას მამა მანქანების მექანიკოსია. შვილის ინტერესს ამ ხელობისა და, მით უფრო, მექანიკოსობის მიმართ აღტაცებით არ შეხვედრია. ლიკა ამბობს, რომ მამა ყველაზე კარგად ხვდებოდა საქმის სირთულეს და იმასაც, თუ რა წინააღმდეგობების წინაშე აღმოჩნდებოდა მისი ქალიშვილი. ბოლოს, დედის რჩევით, ლიკამ იურიდიულზე ჩააბარა, თუმცა ავტოსფეროზე უარი არ უთქვამს. უნივერსიტეტში სწავლის პარალელურად, მამას სამსახურში დაჰყვებოდა და მანქანასაც საფუძვლიანად სწავლობდა.
ლიკა ამბობს, რომ გამოცდილება სხვადასხვა სამსახურში არაერთი იმედგაცრუებისა და სტრესული ეტაპის დაძლევით დააგროვა. აზრს, რომ მანქანის მექანიკოსობა ქალის საქმე არაა, არაერთხელ შეეჯახა. რადგან გოგო იყო, მომხმარებლები არასერიოზულად აღიქვამდნენ, უნდობლობის გამო გაჰქცევიან კიდეც. თუმცა ამ წინააღმდეგობებს გამოცდილებად იღებდა და უკან დახევა არც უფიქრია.
„თეგეტა ჰოლდინგში“ ლიკა მეგობრის რჩევით მივიდა. წლების განმავლობაში ოცნებობდა – ემუშავა იქ, სადაც საქმის კეთებას მშვიდ, სტერეოტიპებისგან თავისუფალ გარემოში შეძლებდა; სადაც გენდერული თანასწორობა პრინციპულად მნიშვნელოვანია. გასაუბრების გავლის შემდეგ მოსწავლე მექანიკოსად აიყვანეს სავალი ნაწილის მიმართულებით. დღეს უფროსი მექანიკოსია და სამუხრუჭე სისტემაზე მუშაობს.
„აღმოვჩნდი კომპანიაში, რომელიც ყველანაირად გიწყობს ხელს განვითარებასა და პროფესიულ ზრდაში; საშუალებას გაძლევს, ისწავლო და დასაქმდე. „თეგეტაში“ ჯანსაღი და თბილი გარემოა. მენეჯერებიდან დაწყებული, მექანიკოსებით დამთავრებული, ყველა მზადაა, დაგეხმაროს“.
ლიკა მიიჩნევს, რომ თვითგანვითარებაზე ზრუნვას მის საქმეში გადამწყვეტი მნიშვნელობა აქვს. ამიტომ ძნელად შესასრულებელი სამუშაო არასდროს აშინებს, პირიქით, რაც უფრო პრობლემურია მანქანა, მით უფრო კმაყოფილია სირთულეებთან შეჭიდების შესაძლებლობით.
ლიკა ამბობს, რომ პრინციპულობისა და მიზნისკენ ჯიუტად სვლის შედეგად შეძლო, ბავშვობის ოცნება რეალობად ექცია და მანქანის პროფესიონალი მექანიკოსი გამხდარიყო. მიიჩნევს, რომ, თუ რაიმე მართლა გინდა, არანაირი მნიშვნელობა არ აქვს, რას ფიქრობენ სხვები.
„ნამდვილად რთული საქმეა, მაგრამ, თუ ამის კეთება მთელი გულით გინდა, თავისუფლად შესაძლებელია, რომ სირთულეები გამოწვევებად აქციო და მათი დაძლევით სიამოვნება მიიღო. მომხმარებლების ღიმილიანი, კმაყოფილი და ცოტათი გაოცებული სახეები კიდევ უფრო მიძლიერებს მოტივაციას“.
ლიკა მიიჩნევს, რომ გენდერული სტერეოტიპები ის მთავარი მიზეზია, რის გამოც ჩვენს ქვეყანაში ქალი მექანიკოსები პრაქტიკულად არ არიან. ყოფილა მომენტები, როცა ირონიული დამოკიდებულების გამო თავი განსაკუთრებით ცუდად უგრძნია. ამას ემატება ისიც, რომ მანქანის მექანიკოსობა ფიზიკური თვალსაზრისითაც რთული სამუშაოა, ბევრ ძალასა და ენერგიას მოითხოვს.
ლიკასთვის წარმატების მნიშვნელოვან ფაქტორად ოჯახის გვერდში დგომა იქცა. მისი მეუღლეც მექანიკოსია, მისი მთავარი მხარდამჭერი და თანამოაზრე.
