Matière Première – ნიშური პარფიუმერიის ახალი ხედვა
სუნამო ის დეტალია, რომელიც ადამიანის ინდივიდუალიზმს საუკეთესოდ გამოხატავს. სურნელი იმდენად დამახასიათებელი შეიძლება იყოს, რომ პიროვნების ნაწილადაც კი იქცეს. და როცა საქმე ეხება ნიშურ პარფიუმერიას, ის ამ იდეას კიდევ უფრო საინტერესო კონტექსტში წარმოაჩენს. ნიშური პარფიუმერიის თანამედროვე ბაზარზე გამორჩეულ სახელებს თუ გადავხედავთ, ერთ-ერთი პირველ მოწინავე ბრენდად Matière Première სახელდება.
მსოფლიოში პოპულარულ ბრენდს საქართველოში ექსკლუზიურად „არომატეკა“ წარმოადგენს. ახლახან სწორედ „არომატეკას” სპეციალური მოწვევით, Matiere Premiere-ს წარსადგენად, თბილისს ბრენდის დამფუძნებლები – პარფიუმერი აურელიან გიშარი და კაიუს ვონ ნორინგი ესტუმრნენ და მასტერკლასების სერია გამართეს.
ფრანგულ ენაზე matière première „ნედლ მასალას“ ნიშნავს, აურელიან გიშარისთვის კი ეს ცნება ნიშური სუნამოების სრულიად ახალ ფილოსოფიას გამოხატავს. მისი ბრენდის არომატები ერთი მთავარი ნატურალური ინგრედიენტის ირგვლივ ტრიალებს – ეს არის სუნამოები მაღალი კონცენტრაციით, ზედმეტი დეკორაციის გარეშე და სწორედ ეს ხდის მას უნიკალურს. Matière Première-ს – როგორც ბრენდის ხასიათი მნიშვნელოვნად არის დაკავშირებული აურელიან გიშარის პერსონასთან. აურელიანი საფრანგეთში, გრასში დაიბადა, რომელსაც პარფიუმერიის ქალაქად მოიხსენებენ. თავად გიშარი პარფიუმერთა თაობების შთამომავალია. მაგალითად, მისი მამა – ჟან გიშარი ცნობილი პარფიუმერი იყო, რომელიც Givaudan-ის პარფიუმერიის სკოლას ხელმძღვანელობდა. აურელიან გიშარმაც თავისი კარიერა საოჯახო საქმიანობას მიუძღვნა. ის წარმატებულ პარფიუმერად იქცა და სხვადასხვა დროს არაერთი ცნობილი სუნამო შექმნა ისეთი გავლენიანი მოდის სახლებისთვის, როგორებიც არის: Gucci, Narciso Rodriguez, Issey Miyake, Versace და ასე შემდეგ. აურელიანმა ამასობაში უნიკალური სტილი დაიმკვიდრა ბუნებრიობით და სურნელში ინგრედიენტების მაქსიმალური გამოხატულებით.
2019 წელს გიშარმა საკუთარი ბრენდი Matiere Premiere დააფუძნა, რომელმაც ნიშურ სუნამოებში სრულიად ახალი ხედვა წარადგინა. გარდა ამისა, გიშარი ფლობს ორგანული ვარდის პლანტაციას გრასში, სადაც თავად აწარმოებს Radical Rose-ის ვარდის ექსტრაქტს.
„არომატეკას” ორგანიზებით გამართულ მასტერკლასზე აურელიან გიშარმა სუნამოების კონცეფციასა და მათი შექმნის პროცესზე ისაუბრა. მასტერკლასის მსვლელობისას და აურელიან გიშარის მოსმენისას თითოეული დამსწრისათვის ცხადი იყო, რომ პარფიუმერისათვის ეს პროცესი ერთგვარი შემოქმედებაა – რაღაც უნიკალურის დაბადების მომენტი.
„სხვადასხვა ბრენდთან 25-წლიანი მუშაობის შემდეგ, გადავწყვიტე მეჩვენებინა, თუ რა არის ჩემთვის ყველაზე მშვენიერი სუნამოებში. როდესაც სხვისთვის მუშაობ, შენ როგორც პარფიუმერმა, ამ ბრენდის ხასიათი უნდა გადმოსცე სურნელში. Matiere Premiere-ზე მუშაობისას კი სრულიად განსხვავებული რამის შექმნა მინდოდა. სუნამოების შექმნისას ნედლი მასალის გამოყენება, მასზე კონცენტრირება ჩემთვის თავიდანვე განსაკუთრებით მნიშვნელოვანი იყო. როცა პარფიუმერიას სწავლობ, ხვდები, რომ ამ პროფესიაში ინგრედიენტები შენთვის სიტყვებია, საკომუნიკაციო ენაა, რომლითაც სათქმელი უნდა თქვა. ეს მშვენიერი და პოეტური პროცესია,” – ამბობს აურელიან გიშარი.
მსოფლიო ბაზარზე ნიშური პარფიუმერიის პოზიცია ბოლო წლებში მნიშვნელოვნად გაძლიერდა. ასევე მნიშვნელოვნად გაიზარდა მოთხოვნა უნიკალურ, მაღალი ხარისხის ინგრედიენტებით შექმნილ სუნამოებზე. მომხმარებლები უფრო და უფრო მეტად ეძებენ ინდივიდუალიზმის გამომხატველ სურნელს და მეტ ყურადღებას აქცევენ ხარისხს. სწორედ ამიტომ Matiere Premiere-მა ცნობადობის და რეპუტაციის მოპოვება მალევე შეძლო.
თბილისში გამართულ მასტერკლასს ასევე დაესწრო Matiere Premiere-ს თანადამფუძნებელი – კაიუს ვონ ნორინგი. მან ის პერიოდი გაიხსენა, როდესაც ბრენდი მსოფლიოს პირველად წარუდგინეს.
„Matiere Premiere ახალგაზრდა ბრენდია. ჩვენი ბაზარზე შესვლის პირველი ეტაპი ძალიან რთულ პერიოდს, პანდემიას დაემთხვა. ამ დროს არ ტარდებოდა ფიზიკური ღონისძიებები, შეზღუდული იყო პრეზენტაციის შესაძლებლობა. ჩვენ მსოფლიოს სხვადასხვა წერტილში კატალოგით ვაგზავნიდით სუნამოების სინჯებს. ეს კატალოგები ადრესატამდე ზოგჯერ კვირების დაგვიანებით მიდიოდა. ყველა გაოცებული იყო იმ ფაქტით, რომ სურნელი კვლავაც ძალიან ინტენსიური იყო.”
Matiere Premiere-ს სერია სხვადასხვა სუნამოებს მოიცავს. როგორც აურელიან გიშარს ჩანაფიქრშივე სურდა, თითოეული მათგანი საკუთარ ამბავს ჰყვება. სუნამოების უკეთ გაცნობა და მათი შეძენა „არომატეკას” სივრცეებშია შესაძლებელი.