27 მარტი დილიდან
დილა მშვიდობისა, დღეს 27 მარტია.
დღე ორი სამწუხარო ამბით უნდა დავიწყოთ – გვიან ღამე გარდაიცვალნენ ქართველი მუსიკოსი თამარ (ბაბი) ბაბილუა და მსახიობი ნოდარ მგალობლიშვილი.
AT.GE-ის რედაქცია მწუხარებას გამოთქვამს და უსამძიმრებს მათ ოჯახებსა და მეგობრებს.
ქართველი მსახიობი ნოდარ მგალობლიშვილი 87 წლის ასაკში გარდაიცვალა მგალობლიშვილმა კოტე მარჯანიშვილის დრამატულ თეატრში მუშაობა 1954 წელს დაიწყო.
ადრეული პერიოდის როლებიდან გამოირჩევა მაქსიმ გორკის “ფსკერზე”, ჰენრიკ იბსენის “მოჩვენება”, უფრო მოგვიანებით – ლეო ქიაჩელის “ჰაკი აძბა”, იაგოს როლი უილიამ შექსპირის “ოტელოში”, თეიმურაზ ხევისთავი მიხეილ ჯავახიშვილის “ჯაყოს ხიზნებში”. კინემატოგრაფიაში ყველაზე დასამახსოვრებელი და გამორჩეული როლი მისი შესრულებით მარკ ზახაროვის “სიყვარულის ფორმულაში” გრაფი კალიოსტროა.
მუსიკოსი თამარ (ბაბი) ბაბილუა 31 წლის ასაკში გარდაიცვალა
ბაბი ბოლო პერიოდში მძიმედ ავადმყოფობდა. მუსიკოსს 2015 წელს სიმსივნის დიაგნოზი დაუსვეს, თუმცა ჯგუფში სიმღერა არ შეუწყვეტია. პირველი ოპერაციის შემდეგ მან საქართველოს რეკორდი დაამყარა – 25 საათის განმავლობაში შეუსვენებლად დაუკრა ფორტეპიანოზე.
Telegram ახალ ფუნქციას ამატებს, რომლითაც სხვისი მობილურიდან შეტყობინებებს წაშლით
განახლების შემდეგ ახლა უკვე შეგეძლებათ ჩატში სხვის მიერ გამოგზავნილი შეტყობინებებიც წაშალოთ. უფრო მეტიც, თქვენ შეგიძლიათ ჩატის მთლიანი ისტორია გააქროთ, თანაც არა მხოლოდ თქვენს, არამედ სხვის მობილურშიც. კომპანიის დამფუძნებელმა პაველ დუროვმა განაცხადა, რომ ძველი შეტყობინებების ბოროტად გამოყენების შემთხვევები უფრო და უფრო ხშირდება. ნებისმიერი რამ, რაც თქვენ დღეს თქვით, შესაძლოა ხვალ თქვენ წინააღმდეგ იქნეს გამოყენებული. ახალი ფუნქციით კი თქვენ შეტყობინებებზე სრულ კონტროლს შეძლებთ.
წყარო: https://www.engadget.com
Apple-მა საზოგადოებას ეფლის საკრედიტო ბარათი წარუდგინა
:no_upscale()/cdn.vox-cdn.com/uploads/chorus_asset/file/15985633/lcimg_aed3a291_dcab_4ff5_9951_5969b9dbd89b.jpg)
კომპანიის ინფორმაციით, ბარათით სარგებლობისთვის არავითარი დამატებითი გადასახადების გადახდა არ არის საჭირო, ხოლო მომხმარებელთათვის ბარათის საპროცენტო პირობები და ჯილდოები მიმზიდველი იქნება.
ციფრული ბარათის მიღებას მომხმარებლები აპლიკაცია Apple Wallet-ის საშუალებით შეძლებენ და მხოლოდ იმ მაღაზიებსა და დაწესებულებებში გამოიყენებენ, რომლებსაც Apple Pay-ის მხარდაჭერა აქვთ. ეფლის სხვა პროდუქტების მსგავსად, უსაფრთხოებასა და კონფიდენციალურობაზე ამ შემთხვევაშიც დიდი აქცენტია გაკეთებული.
წყარო: https://www.theverge.com/
შერეული ორთაბრძოლის ყოფილი ჩემპიონი, ირლანდიელი კონორ მაკგრეგორი კარიერას ასრულებს.
ამის შესახებ მან ოფიციალურ Twitter-ზე დაწერა. კონორ მაკგრეგორი – შერეული საბრძოლო ხელოვნების მებრძოლი – UFC-ის ეგიდით გამოდიოდა. კარიერის განმავლობაში მან 25 ბრძოლა ჩაატარა და 21-ში გაიმარჯვა.
წყარო: https://edition.cnn.com
დედიკას გალერეა გიწვევთ პოლიკარპე ქლიბაძის პერსონალურ გამოფენაზე – “ქაოსის წესრიგი”.
ჩვენს სივრცეში პირველად იქნება გამოფენილი მხატვრის ახალი ნამუშევრები, რომლებიც ბოლო პერიოდის მხატვრულ ძიებებს ასახავს და სრულიად ახლებურად წარმოაჩენს მის შემოქმედებას.
წყარო: https://www.facebook.com/
“მულტიმედია განათლების ცენტრი” და კომპანია “საქდოკფილმი” გიწვევთ მოკლემეტრაჟიანი დოკუმენტური ფილმების ჩვენებაზე.
ფილმების სერია “16 ქალი ცვლილებისთვის” ამერიკის საელჩოს ფინანსური მხარდაჭერით შეიქმნა და აერთიანებს ახალგაზრდა ქალი დოკუმენტალისტების მიერ შექმნილ 16 ფილმს საქართველოში მცხოვრებ ქალებზე.
წყარი: https://www.facebook.com/
ლიბანელი რეჟისორი და მსახიობი ნადინ ლაბაკი წელს კანის კინოფესტივალზე სექცია “განსაკუთრებული ხედვის” ჟიურის თავმჯდომარე იქნება.
სექციაში “განსაკუთრებული ხედვა” სულ ოცი ფილმი მიიღებს მონაწილეობას, რომლებიც ორიგინალური და განსხვავებული სტილით გადმოსცემენ ისტორიას.
წყარო: https://www.instagram.com/