ილუსტრატორ გიორგი გრძელიშვილის ახალი ნამუშევრები – Acid Vol.2

ილუსტრატორმა გიორგი გრძელიშვილმა, რომელსაც ჩვენი მკითხველი უკვე იცნობს, ახალი ნამუშევრები გამოაქვეყნა. ამჯერად მისი ყურადღების ქვეშ ელექტრონული მუსიკის სუბჟანრი Acid მოექცა, რომლის კვლევაც დაიწყო და შთაბეჭდილებები ვიზუალურ-მუსიკალურ ნამუშევრებში ასახა. ის ამბობს, რომ ეს პროცესი მისთვის ექსპერიმენტი იყო, რადგან აქამდე მუსიკის შექმნასთან შეხება თითქმის არ ჰქონია, თუმცა ამ გამოწვევას არ მოერიდა და პირველი პროექტი წარმატებით დაასრულა.

პროექტის ფარგლებში გიორგიმ ვინილების და ქავერების უნიკალური აუდიო-ვიზუალური მასალა შექმნა, რომლებიც 80-90-იანი წლების ვინილების ავთენტურად გამოიყურება. ამ მიზნის მიღწევაში მას ხანგრძლივი კვლევა და ძიება დაეხმარა, რაც თითოეული დეტალის ყურადღებით შესწავლას გულისხმობდა.

“მნიშვნელოვანი იყო მთლიანი სტრუქტურა. მაგალითად ტერმინოლოგია რომ უბრალოდ არ “გადამეწერა”.  ცალკე იმის კვლევა, რომ ყველაფერი კავშირში ყოფილიყო ერთმანეთთან, თუ ქავერზე გადმოვიტანდი 140BPM-ს შესაბამისად მუსიკაც 140BPM უნდა ყოფილიყო, ჯამში წარმოსახვითი პროდუქტის შექმნა გამოვიდა , რომელიც თითქოს რეალურ სამყაროში არსებობს ვინილზე, აქვს ყველაფერი, მაგრამ თან არ არსებობს, თან ძველია თან ახალი, დროსთან თამაშია”