ჯგუფური გამოფენა „Dialogues“ Raum Art Space-ში
ავტორი: თინათინ ღუღუნიშვილი-ბრუკი
Raum Art Space და TGB Art Projects 20 მაისიდან 12 ივნისამდე ჯგუფურ გამოფენას „Dialogues“ წარმოგვიდგენს.
„Dialogues“ ქართველი ხელოვანის, ოთო შენგელიასა და საბერძნეთში მოღვაწე არტისტული დუოს — ძმები კაპურანების — ნამუშევრებს აერთიანებს. პროექტი სხვადასხვა მხატვრული მიდგომის, მედიუმისა და ვიზუალური ენის დიალოგს ეფუძნება. გამოფენა თანამედროვე ფერწერის შესაძლებლობებსა და მის მატერიალურ, ფიზიკურ ბუნებაზე ამახვილებს ყურადღებას.
ექსპოზიციაზე წარმოდგენილია მარჯანო კაპურანისა და დენის კაპურანის ფერწერული ნამუშევრები, რომლებიც ფოტოგრაფიულ, ციფრულ და კინემატოგრაფიულ გამოსახულებებს მხატვრობის ენად გარდაქმნის. პარალელურად, ოთო შენგელია სივრცით ინსტალაციებსა და ობიექტებზე დაფუძნებული მიდგომით მუშაობს — ტილო მის ნამუშევრებში ხშირად იკეცება, იშლება, ფრაგმენტდება და ფერწერა სივრცობრივ ფორმად გარდაიქმნება.
პროექტის კონცეფცია მხატვრობას, როგორც ცოცხალ და მუდმივად გარდაქმნად მედიუმს განიხილავს. ციფრული ვიზუალებით გადატვირთულ გარემოში „Dialogues“ ადამიანის ჟესტს, მატერიალურობასა და ფიზიკურ კვალს კვლავ ცენტრალურ მნიშვნელობას ანიჭებს.
ამავდროულად, პროექტი ნაწილობრივ ეხმიანება ხელოვნებათმცოდნე იზაბელ გრავის ხედვას, რომლის მიხედვითაც მხატვრობის მნიშვნელობა მხოლოდ გამოსახულებაში არაა — ის მატერიაში, ზედაპირსა და შესრულების პროცესშიც იკითხება.
მარჯანო კაპურანი (დაბ. 1984) და დენის კაპურანი (დაბ. 1990) ათენში მცხოვრები და მოღვაწე არტისტული დუო არიან, რომლებიც 2015 წლიდან ერთობლივად მუშაობენ. ორივე ხელოვანი ათენის სახვითი ხელოვნების აკადემიის კურსდამთავრებულია. მათი პრაქტიკა აერთიანებს ფერწერას, ფოტოგრაფიას, ციფრულ გამოსახულებებსა და ინსტალაციას. მათი პრაქტიკა იკვლევს, როგორ გარდაიქმნება კინო, მედია და ციფრული ვიზუალი მატერიალურ გამოსახულებად. კაპურანების ნამუშევრები წარმოდგენილი ყოფილა საერთაშორისო გამოფენებსა და არტ-პლატფორმებზე საბერძნეთში, გერმანიაში, იტალიასა და ევროპის სხვა ქვეყნებში.
ოთო შენგელია 1991 წელს დაიბადა და თბილისში ცხოვრობს. მან სწავლა შოთა რუსთაველის თეატრისა და კინოს უნივერსიტეტში, ანიმაციის ფაკულტეტზე მიიღო, მოგვიანებით კი CCA თბილისის არაოფიციალურ სამაგისტრო პროგრამაში — Creative Mediation — განაგრძო. მისი პრაქტიკა აერთიანებს ფერწერას, ობიექტსა და სივრცით ჩარევებს. შენგელიას ნამუშევრები ხშირად იკვლევს გამოსახულების, მასალისა და აღქმის ურთიერთმიმართებას.
„Dialogues“ თანამედროვე მხატვრობის განსხვავებულ ფორმებს შორის დიალოგს ქმნის, სადაც გამოსახულება, მატერია და ადამიანის კვალი ერთმანეთთან ახალ კავშირს ამყარებს.
პროექტის კურატორია თინათინ ღუღუნიშვილი-ბრუკი.
ექსპოზიცია გაიმართება Raum Art Space-ში, მისამართზე: გალაკტიონ ტაბიძის ქუჩა #18, თბილისი.
სამუშაო საათები:
ხუთშაბათი–პარასკევი: 17:00 – 20:00
შაბათი–კვირა: მხოლოდ წინასწარი შეთანხმებით
დამატებითი ინფორმაციისთვის:
+995 599 20 80 22