Tbilisi Open Air 2018 დღე მეორე
ფესტივალის მეორე დღე Singer Jazz Stage-სთვის ბევრად უფრო დატვირთული და მრავალფეროვანი იყო. ამის მიზეზი ის გახდლათ, რომ სცენის არტისტული შემადგენლობა 4 სხვადასხვა საინტერესო მუსიკალურ პროექტს მოიცავდა.
13:00 ზე ლიკანის სცენაზე ჯაზ პიანისტი და კომპოზიტორი დინი ვირსალაძე ტრიოსთან ერთად წარსდგა. ლისი ვონდერლენზე ადრე ამოსული აუდიტორიისთვის მისი კონცერტი საკმაოდ საინტერესო მუსიკალური მოგზგაურობა აღმოჩნდა.
მიუხედავად იმისა, რომ ზაფხულის წვიმამ თავი კიდევ ერთხელ შეგვახსენა, ნამდვილი მელომანებისთვის ეს პრობლემა არ აღმოჩნდა. პროექტ Blue Moor და ლაშა აბაშმაძის კვინტეტი სცენის მორიგ ღირშესანიშნაობებად იქცნენ. ხოლო მათ, ვინც Singer Jazz Stage-ს შუაღამეს ეწვია, დუეტ Mass Montage-ის ენერგიული ცოცხალი შესრულების მოსმენა შეეძლოთ.
რაც შეეხება სხვა მუსიკალურ სივრცეებს, მსმენელს ამ დღეს როიშინ მერფის, პაპუზის, რეიჩელ იამაგატას და სხვა გამორჩეული არტისტების მოსმენა შეეძლოთ.
რეიჩელ იამაგატა დაახლოებით 15 წელია თავისი მუსიკით ინდი ესთეტიკის მოყვარულ მსმენელს ახარებს, ამიტომ, მას ლისზე შეკრებილ აუდიტორიასთან კომუნიკაცია წამითაც არ გაჭირვებია. განსხვავებული იყო ფრანგულ პროექტ Papooz-ის კონცერტი. პარიზულმა დუეტმა მაყურებელი თავისი დინამიური მუსიკით და შარმით მოხიბლა.
რაც შეეხება როიშინ მერფს, მისი, როგორც ფესტივალის მთავარ ჰედლაინერის მიმართ განსაკუთრებული მოლოდინი არსებობდა. „მოლოკოს“ ყოფილმა წევრმა და წარმატებულმა სოლო არტისტმა მსმენელს მრავაფეროვანი რეპერტუარი შესთავაზა. სხვადასხვა ალბომებიდან შესრულებული სიმღერების გარდა, მან ყველასთვის საყვარელი Sing It Back-ის რემიქს ვერსიაც იმღერა და აუდიტორიაში ნოსტალგიის განცდა კიდევ უფრო გააღვივა.
ლაივებით კმაყოფილი მსმენელის ნაწილი ძალების აღსადგენად სახლისკენ გაემართა, ნაწილმა კი Garden Stage და Eye Stage-ზე გართობა ამჯობინა. ორივე სცენა მუსიკალურად ძალიან დატვირთული იყო, რამაც საცეკვაო მოედანზე შეკრებილ ადამიანებს ენერგიის გაცვლის და დილამდე ცეკვის საშუალება მისცა.