სერვისმა Snapchat-მა, ინტერნეტ მაღაზია Amazon-თან ერთად, სატესტო რეჟიმში ახალი მომსახურება აამუშავა. მომხმარებელი სმარტფონის კამერას ამა თუ იმ ნივთის ეტიკეტისკენ, ლოგოსკენ, სავაჭრო ნიშნების ან შტრიხ-კოდისკენ მიმართავს, ხოლო პროგრამა ავტომატურად ახდენს მის იდენტიფიცირებას და პოულობს შესაბამის პროდუქტს Amazon-ის ონლაინ მაღაზიაში. შესაბამისად, სმარტფონის ეკრანზე აისახება ნივთის ღირებულება, რეიტინგი და შეძენის სხვა პირობები.
სფეროს სპეციალისტების განმარტებით, ჯერჯერობით უცნობია, არის თუ არა ამ წამოწყებაში გათვალისწინებული Snapchat-ის ფინანსური ინტერესები. ანალიტიკოსები იმასაც არ გამორიცხავენ, რომ სერვისი ფინანსურ მოგებას არ ელოდება და ამ გზით ცდილობს, მეტი მომხმარებელი მოიზიდოს და კონკურენცია გაუწიოს ისეთ პლატფორმებს, როგორებიცაა Instagram და Pinterest.
Snapchat -ის განახლება სატესტო რეჟიმშია, თუმცა ის მომხმარებლების მცირე ნაწილმა უკვე გამოსცადა.
