2 აპრილი – დილიდან

პეკინის საერთაშორისო კინოფესტივალზე წელს ორი ქართული ფილმი მიიღებს მონაწილეობას

პეკინის კინოფესტივალის მთავარი ჯილდოს, Tiantan Award-ის მოპოვების შესაძლებლობა ანა ურუშაძის ფილმს – “საშიში დედა” და მარიამ ხაჭვანის ფილმს – “დედე” ექნებათ. აღსანიშნავია ისიც, რომ კინოფესტივალის სექციაში “პანორამა” ნაჩვენები იქნება ელდარ შენგელაიას ახალი ფილმი “სავარძელი”. პეკინის საერთაშორისო კინოფესტივალი 15-დან 22 აპრილამდე გაიმართება.
წყარო: http://www.gnfc.ge/geo/news/1476

ფრანგი რეჟისორების გილდიის გადაწყვეტილებით, კანის 71-ე საერთაშორისო კინოფესტივალზე საპატიო ჯილდოს მარტინ სკორსეზეს გადასცემენ

“მოხარულები ვართ, რომ ჯილდოს ისეთი არაჩვეულებრივი რეჟისორი მიიღებს, როგორიც მარტინ სკორსეზეა”, – ნათქვამია ფრანგი რეჟისორების გილდიის განცხადებაში. აღნიშნული ჯილდო უკვე მიღებული აქვთ ისეთ რეჟისორებს, როგორებიც არიან ჯეინ კამპიონი, ჯიმ ჯარმუში, კლინტ ისტვუდი, ვერნერ ჰერცოგი და ა.შ. კანის კინოფესტივალი 8 მაისს დაიწყება.
წყარო: https://www.hollywoodreporter.com/

Big Little Lies-ის მეორე სეზონს მერილ სტრიპის შემდეგ კიდევ ერთი მსახიობი დაემატა

2019 წელს HBO-ს ბოლო დროის ერთ-ერთი ყველაზე წარმატებული, ემის მფლობელი სერიალი – Big Little Lies მეორე სეზონით დაბრუნდება. სერიალში ძველი მსახიობების გარდა ვიხილავთ მერილ სტრიპსაც, რომელიც სელესტის [ნიკოლ კიდმანის გმირი] დედამთილის როლს შეასრულებს. გარდა ამისა, HBO-ს პოპულარული სერიალის მეორე სეზონში ვიხილავთ კანადელ-ამერიკელ მსახიობ დუგლას სმისტს. ის შოუში კორი ბროკფილდის როლს შეასრულებს, რომელიც ჯეინის [შეილინ ვუდლის] თანამშრომელია. ახალ სეზონთან დაკავშირებით ცნობილია ისიც, რომ მეორე ნაწილის რეჟისორი ანდრეა არნოლდი იქნება, რომელსაც ისეთ პროექტებზე უმუშავია, როგორებიცაა Transparent, I Love Dick და სხვები.
წყარო: http://deadline.com/

ინსტაგრამმა და სნეპჩატმა, Giphy-ს სტიკერები აპლიკაციებიდან მას შემდეგ წაშალეს, რაც რასისტული გიფები აღმოაჩინეს

ახლა კი მომხმარებლებს სტიკერებით სარგებლობა კვლავ შეუძლიათ. Giphy-მ მის ბაზაში არსებული შეცდომა გამოასწორა და რასისტული გიფები უკვე ამოღებულია.
წყარო: https://www.engadget.com/

Vogue-ს ისტორიაში პირველად ჟურნალის გარეკანზე ჰიჯაბიანი მოდელი გამოჩნდება

ბრიტანული ვოგის მაისის ნომრის ყდაზე კენიელი 20 წლის მოდელი ხალიმა ადენი იქნება, რომელიც ფოტოსესიაში სხვა რვა მოდელთან ერთად მიიღებს მონაწილეობას.
წყარო: https://www.independent.co.uk/

ჩინური კოსმოსური სადგური დედამიწისკენ მოექანება და ჩვენს ატმოსფეროში, სავარაუდოდ, სწორედ დღეს, 2 აპრილს შემოვა

მიუხედავად იმისა, რომ ამის შანსი ძალიან მცირეა, უნდა ითქვას ისიც, რომ ჩამოვარდნის არეალში საქართველოც მოიაზრება. ჩინეთმა კოსმოსურ სადგურ Tiangong-1-ზე კონტროლი 2016 წელს დაკარგა და მას შემდეგ კოსმოსში მოძრაობს. ევროპის კოსმოსური სააგენტოს ცნობით, უკონტროლო მოძრაობის გამო მისი ვარდნის ტრაექტორიის გამოცნობა წარმოუდგენელიც კია.
წყარო: https://www.theguardian.com/

საქართველოს ტელერადიოცენტრი თბილისის სატელევიზიო ანძის ტურისტულ წერტილად გადაქცევას გეგმავს

ამ მიზნით კომპანია ტენდერს აცხადებს, რომლის სავარაუდო ღირებულებაც 120 ათასი ლარია. თბილისის ანძა ზღვის დონიდან 719,2 მეტრის სიმაღლეზეა, მისი სიგრძე კი – 277,8 მეტრია. სატელევიზიო ანძა 1973 წელს ააგეს.

Incredibles 2-თან ერთად, 15 ივნისს, ანიმაციური კინოსტუდია Pixar ახალ მოკლემეტრაჟიან მულტფილმს გამოუშვებს

7-წუთიანი ანიმაციის მთავარი პერსონაჟი ბაოა, ჩინელ-კანადელი ქალი, რომელსაც დეპრესია აქვს და ცდილობს ცხოვრების აზრი დაიბრუნოს. სწორედ ამ დროს თავისივე ხელით გაკეთებული ცომის ერთ-ერთი გუნდა გაცოცხლდება და მის საუკეთესო მეგობრად იქცევა. აღსანიშნავია, რომ ბაო პიქსარის ისტორიაში პირველი მოკლემეტრაჟიანი ანიმაციაა, რომლის რეჟისორიც ქალია.
წყარო: http://ew.com/movies/

დღეს მსოფლიო საბავშვო წიგნის საერთაშორისო დღეს აღნიშნავს

ეს დღე 1967 წელს საერთაშორისო ორგანიზაცია “ახალგაზრდული და საბავშვო წიგნების საერთაშორისო საბჭომ” დააარსა, რომელსაც ჰანს ქრისტიან ანდერსენის დაბადების დღეს, 2 აპრილს აღნიშნავენ.