fbpx

2018 წლის 10 საუკეთესო ჯაზალბომი


გააზიარე სტატია

 

2018 წლის 10 საუკეთესო ჯაზალბომი:



R+R=NOW ‎– Collagically Speaking

წლევანდელი ჯაზფესტივალის სტუმარი, სუპერჯგუფი R+R=NOW, რომელიც თანამედროვე ჯაზის უდიდესი წარმომადგენლების მიერ შექმნილი პროექტია, მსმენელის წინაშე სადებიუტო ალბომით წარდგა. ვარსკვლავური შემადგენლობა მოიცავს პიანისტ რობერტ გლასპერს, რომელიც აქ ერთხელ უკვე იმყოფებოდა, ქრისტიან სკოტს, რომელსაც ასევე მოუსმინა ქართველმა მსმენელმა 2010 წელს, ტეილორ მაკფერინს და სხვა დიდ სახელებს. Collagically Speaking-ს ყველაფერი აქვს, რაც შეიძლება თანამედროვე ჯაზს ჰქონდეს. ფანკის, სოულის და R&B-ის მდიდარი ელემენტებით გაჯერებული ეს ალბომი ნამდვილი ფეიერვერკია, რომელიც სრულად ამართლებს ჯგუფის წევრი მუსიკოსების სახელებს.

 

John Coltrane – Both Directions at Once: The Lost Album 

ჯერჯერობით წლის  ყველაზე ინტენსიურად განხილვადი ამბავი მუსიკალურ სამყაროში ალბათ ჯაზგიგანტის, ჯონ კოლტრეინის დაკარგული ჩანაწერის აღდგენა და გამოცემაა. ერთი მთლიანი ჩანაწერი, რომელიც ისეთ სახელებს მოიცავს, როგორებიც არიან: ჯონ კოლტრეინი (საქსოფონი), მაკკოი ტაინერი (პიანო), ჯიმი გერისონი (ბასი) და ელვინ ჯონსი (დრამი), შვიდ ცალკეულ კომპოზიციად დაიშალა და ალბომი ამ სახით გამოვიდა. სპირიტუალური და „თავისუფალი“ (Free Jazz) ჯაზის უდიდესი წარმომადგენლების ამ სესიით ყველანაირი მუსიკალური მოთხოვნილების დაკმაყოფილებაა შესაძლებელი.

 

Hailu Mergia – Lala Belu 

ჯაზის დასავლელი მოყვარულებისთვის ერთ დროს უცნობი ეთიოპიელი აკორდეონისტი Hailu Mergia მუსიკის ენთუზიასტმა და ლეიბლ Awesome Tapes From Africa-ს დამფუძნებელმა ბრაიან შიმკოვიცმა აღმოაჩინა. ეთიოპიური ჯაზის ერთ-ერთი მარგალიტი ახლა აფრიკული მუსიკის სერიოზულ მოყვარულებს შორის უკვე ცნობილი მუსიკოსია. 2018 წელს ხელახლა გამოცემული ამ ალბომის დამსახურებით, ეთიო-ჯაზის გაუვალ ჯუნგლებში პირველი ნაბიჯებიც შეიძლება გადადგათ.

 

Roscoe Mitchell & Matthew Shipp – Accelerated Projection 

საკულტო პარიზული ჯაზგაერთიანების, Art Ensemble of Chicago-ს სულის ჩამდგმელის და თანამედროვე პიანისტის, მეთიუ შიპის ეს ლაივალბომი Free Jazz-ის მოყვარულებისთვის ნამდვილი საჩუქარია. ფეთქებადი ფორტეპიანოს და თავშეკავებული ალტო-საქსოფონის დუეტი ერთ-ერთი ყველაზე საინტერესო მუსიკალური თავგადასავალია, რაც ჯერჯერობით 2018 წელს ჯაზის  მიმართულებით ჩაიწერა.

 

Jon Hassell – Listening to Pictures (Pentimento Volume One) 

ლეგენდარული მესაყვირე და გენიალური მუსიკოსი ჯონ ჰასელი 81 წლის ასაკშიც ისეთივე კრეატიულია, როგორიც  მთელი ცხოვრება იყო. მისი უდიდესი ფანები იყვნენ ბრაიან ინო, დევიდ ბირნი (Talking Heads), პიტერ გებრიელი და სხვა მრავალი მუსიკოსი. საკუთარი მუსიკის აღსაწერად ტერმინ Fourth World-ის გამომგონებელი და ეთნოჯაზის ერთ-ერთი მთავარი რეფორმატორი 9-წლიანი შესვენების შემდეგ ხმაურით დაბრუნდა და კარიერის განმავლობაში ჯერჯერობით ყველაზე უფრო ექსპერიმენტული ალბომი გამოსცა.

 

Kamasi Washington – Heaven and Earth 

კამასი ვაშინგტონი თანამედროვე ამერიკელი საქსოფონისტია და ხშირად ჯონ კოლტრეინის შვილობილსაც უწოდებენ. ეს წოდება შესაძლოა ვინმეს გადაჭარბებულადაც მოეჩვენოს, თუმცა,  მეორე უნაკლო ალბომით ჯაზის ყველაზე უფრო კონსერვატორ მოყვარულებსაც კი თავისკენ მოაბრუნებს. Heaven and Earth საკმაოდ სერიოზული ნამუშევარი, ნამდვილი სპირიტუალური ჯაზენერგიით სავსე ალბომია, რომელსაც მსმენელი არაერთხელ უნდა მიუბრუნდეს.

 

Jimi Tenor – Order of Nothingness 

ჯიმი ტენორი ფინელი აუტსაიდერი მუსიკოსია, რომელიც თავს ასეთ იზოლაციაში ყველაზე უფრო კომფორტულად გრძნობს. სამაგიეროდ, მისი მუსიკა იზოლაციონიზმის სრული ანტიპოდია. ეგზოტიკური ინსტრუმენტების გამოყენებით ჩაწერილი ეს ალბომი, ბერლინელ მუსიკოსებთან ერთად, ინტერნეტის საშუალებით შეიქმნა და ჯიმის დისკოგრაფიაში ერთ-ერთი საუკეთესო ჩანაწერის ტიტულით დაიდო ბინა.

 

Binker and Moses – Alive in the East? 

ბოლო წლებში დიდ ბრიტანეთსა და განსაკუთრებით ინგლისში ნამდვილი ჯაზრევოლუცია მიმდინარეობს. ამას მოწმობს უამრავი ახალი არტისტი და არაერთი არაჩვეულებრივი ალბომი. ეს ყველაფერი ადასტურებს იმას, რომ ბრიტანული ჯაზი, ცოცხლდება და ახალ ტალღას იწყებს. Binker and Moses თანამედროვე,  ორი ახალგაზრდა მუსიკოსის დუეტია (საქსოფონი-დრამი), რომელიც ჯაზის ბევრ მოყვარულს ჯონ კოლტრეინის და ელვინ ჯონსის დუეტსაც აგონებს. ამ სტატუსამდე მათ ჯერ კიდევ გზა აქვთ გასავლელი, თუმცა ჩვენ მიერ შერჩეული ამ წლის ლაივალბომი ამ ორი ადამიანის ნიჭის და ცოცხალი ენერგიის კიდევ ერთი დადასტურებაა. Free Jazz-ის მოყვარულები ნუ გამოტოვებთ!

 

Emanative – Earth

თანამედროვე ბრიტანული ჯაზის კიდევ ერთი თვალსაჩინო  ბენდია Emanative, რომელიც სულ ცოტა ხნის წინ გამოცემული მომდევნო ალბომით საბოლოოდ იმკვიდრებს თავს სცენაზე. დრამერ ნიკ ვუდმენსის ჯაზკოლექტივი ბრიტანული მულტიკულტურიზმის მშვენიერებას უსვამს ხაზს და ალბომში წარმოდგენილია აფრიკული, ინდური და ახლოაღმოსავლური მუსიკის ჯაზსინთეზი.

 

Linda Sikhakhane  – Two Sides, One Mirror

თანამედროვე სამხრეთაფრიკული ჯაზი, მიუხედავად იმისა, რომ პრესის დიდ ყურადღებას სათანადოდ ვერ იქცევს, ათწლეულის განმავლობაში საკმაოდ კარგად განვითარდა და დამახასიათებელი სტილიც ჩამოუყალიბდა. ფესვების მიმართ პატივისცემა და ტრადიციულ ხმოვანებაზე დაშენებული ინოვაციურობა საკმაოდ სწორი გზაა არცთუ ისე დიდი community-სთვის. ახალგაზრდა საქსოფონისტი Linda Sikhakhane  2000-იანი წლებიდან იმკვიდრებდა თავს და სადებიუტო ალბომით ამ გზაზე უდიდესი ნაბიჯიც გადადგა.

 

ავტორი: ლევან ძნელაძე

 

 


რეკომენდებული სტატიები
ჯაზ-ფესტივალები საქართველოსა და მსოფლიოში
Play Video

ჯაზ-ფესტივალები საქართველოსა და მსოფლიოში

ჯაზ-ფესტივალები საქართველოსა და მსოფლიოში
დღევანდელ მსოფლიოში ქვეყნის მუსიკალური კულტურა შეგვიძლია იქ მიმდინარე ფესტივალებითაც შევაფასოთ. საქართველოს ამ მხრივ აღმოსავლეთ ევროპაში ერთ-ერთი გამორჩეული ადგილი უკავია, რადგან მნიშვნელოვანი საერთაშორისო ფესტივალების პრაქტიკას, განსაკუთრებით ჯაზში, აქ საფუძველი ჯერ კიდევ საბჭოთა კავშირის დროს ჩაეყარა
ნაპოვნია ლეგენდარული საქსოფონისტის - ჯონ კოლტრეინის 1963 წლის დაკარგული ალბომი
Play Video

ნაპოვნია ლეგენდარული საქსოფონისტის - ჯონ კოლტრეინის 1963 წლის დაკარგული ალბომი

ნაპოვნია ლეგენდარული საქსოფონისტის - ჯონ კოლტრეინის 1963 წლის დაკარგული ალბომი
„ახალი ოთახი დიდ პირამიდაში“ - ასე აფასებენ ამ აღმოჩენას ჯაზში კარგად ჩახედული პროფესიონალები
მიიღე ყოველდღიური განახლებები!
სიახლეების მისაღებად მოგვწერეთ თქვენი ელ.ფოსტა.