ინტერნეტ-გზამკვლევი ხელოვნების ისტორიაში – Monoskop

თუ თქვენი პროფესიული საქმიანობა ხელოვნებას უკავშირდება, ან უბრალოდ მოყვარულის დონეზე გაინტერესებთ ხელოვნების ისტორია, წარმოგიდგენთ ონლაინ-პლატფორმა monoskop-ს.  

პროექტის ავტორებმა ერთ სივრცეში მსოფლიო ხელოვნების 350-მდე სხვადასხვა დარგსა და მიმართულებას მოუყარეს თავი.

ონლაინ-პლატფორმა 1860 წლიდან დღემდე პერიოდს მოიცავს. მომხმარებელს თანამედროვე ხელოვნების ძირითადი ჟანრების გარდა, შეუძლია ნახოს ლეტრიზმის, საუნდ-არტის, ნეოიზმისა და სოფტ-არტის ნიმუშების დიდი კოლექცია.

monoskop ერთგვარი გზამკვლევია ხელოვნების სხვადასხვა მიმართულებაში, თითოეულ მათგანს შესაბამისი ანოტაცია და ინფორმაცია ახლავს. მაგალითად, მითითებულია ჟანრის წამყვანი და ყველაზე ცნობილი წარმომადგენლები, მოყვანილია შესაბამისი ნამუშევრები, ბმულები სხვადასხვა თემატურ ტექსტებსა და ვებრესურსებზე.   

მომხმარებელს შეუძლია მისთვის საინტერესო მასალა: ციფრული წიგნები, ვიდეო-აუდიო ჩანაწერები გადმოწეროს.

ბუნებრივია, ხელოვნების ისტორიაში არცერთი დარგი თუ მიმართულება დამოუკიდებლად არ ვითარდებოდა, შესაბამისად, გზამკვლევი მათი ერთმანეთთან კავშირის გათვალისწინებითაა შედგენილი.

• გერტრუდა კეზებირი – ამერიკელი ფოტოგრაფი, პიქტორიალიზმის ერთ-ერთი ყველაზე ცნობილი წარმომადგენელი. კეზებირის ფოტო: Blessed Art Thou among Women, 1899

• ანტონ ჯულიო ბრაგალია – იტალიელი ფუტურისტი მხატვარი, ფოტოგრაფი და კინორეჟისორი. ანტონ ბრაგალიას ფოტო: Waving, 1911

• სააგიტაციო ხელოვნება. 1919-1921 წლებში შექმნილი სააგიტაციო პლაკატი

• ტარსილა დუ ამარალი – ბრაზილიური მოდერნიზმის წარმომადგენელი, მხატვარი. მისი ნამუშევარი Abaporu, 1928

• კრისტიან შადი – „ახალი საგნობრიობის“ წარმომადგენელი, გერმანელი მხატვარი და გრაფიკოსი. შადის ნამუშევარი „ავტოპორტრეტი მოდელთან ერთად”. 1927

• გაბრიელ პომერანდი – ლეტრიზმის დამაარსებელი, ფრანგი მხატვარი და პოეტი. პომერანდის ნახატი: „ტუსაღი”. 1952

• გი დებორი – ფრანგი ფილოსოფოსი, მწერალი, სიტუაციონიზმის წარმომადგენელი, მხატვარი. დებორის ნამუშევარი „პარიზის ფსიქოგეოგრაფიული გზამკვლევი”. 1957

• ლუიზა ბურჟუა. ფემინ-არტის წარმომადგენელი, ამერიკელი მოქანდაკე, მხატვარი და გრაფიკოსი. Femme Maison. 1946-47