12 ივნისი დილიდან

დილა მშვიდობისა!

დღეს დილიდან გაცნობებთ, რომ ხვალ საქართველოს კინოთეატრებში პედრო ალმოდოვარის ახალი ფილმის, “ტკივილი და დიდებას” პრემიერა გაიმართება. გარდა ამისა, გეტყვით იმასაც, რომ “მე ვარ ბესოს” რეჟისორმა ლაშა ცქვიტინიძემ მეორე მხატვრულ ფილმზე დაიწყო მუშაობა. 

ციმბირში 40 ათასი წლის წინანდელი გიგანტური მგლის თავი აღმოაჩინეს

გიგანტური თავი 2018 წელს ადგილობრივმა მამაკაცმა აღმოაჩინა იაკუტიაში, მდინარე ტირეხტიხის ნაპირზე. სიგრძეში 40 სანტიმეტრია და არ ჰგავს ამჟამად არსებული მგლის არც ერთ სახეობას. სახას რესპუბლიკის მეცნიერებათა აკადემიის პალეონტოლოგის, ალბერტ პროტოპოპოვის განცხადებით, აღმოჩენა უნიკალურია, რადგან წარმოადგენს პლეისტოცენის ეპოქის ზრდასრული მგლის ნაშთებს, რომელიც ქსოვილებსაც შეიცავს.

წყარო: https://edition.cnn.com

13 ივნისს საქართველოს კინოთეატრებში პედრო ალმოდოვარის ფილმის, “ტკივილი და დიდებას” პრემიერა გაიმართება.

ალმოდოვარის ფილმის პრემიერა წელს კანის საერთაშორისო კინოფესტივალზე შედგა და კრიტიკოსების მხრიდან უმაღლესი შეფასებები დაიმსახურა. სურათში მთავარ როლებს ანტონიო ბანდერასი და პენელოპე კრუზი ასრულებენ.

წყარო: https://www.facebook.com/

“მე ვარ ბესოს” რეჟისორი ლაშა ცქვიტინიძე მეორე სრულმეტრაჟიან მხატვრულ ფილმზე იწყებს მუშაობას.

ფილმს “ველი” ერქმევა და ის ახალგაზრდა წყვილზე, ნიკასა და სალომეზე მოგვითხრობს, რომელთა ყოველდღიურ ცხოვრებასაც გრავიტაცია ცვლის. ნიკა მკვლელი ხდება, ხოლო სალომე რელიგიურ სექტაში წევრიანდება.

ფოტო: http://cinemania.adjara.com

ქართველმა არტისტებმა პრაღის კვადრიენალეზე პრიზი მოიგეს

ინფორმაციას ამის შესახებ ფოტოგრაფი მარი ნაკანი ავრცელებს. პრაღაში მიმდინარე სცენოგრაფიისა და სივრცის კვადრიენალეზე საქართველოს სტუდენტურმა გამოფენამ პრიზი საუკეთესო სტუდენტური პავილიონისთვის დაიმსახურა. შოთა რუსთაველის თეატრთან არსებული სცენოგრაფიის სკოლის სტუდენტების პროექტი ორ თემას – აფხაზეთის ოკუპაციას და მედეას აერთიანებს.

წყარო: https://www.facebook.com/

თბილისური ეზოების სეზონი გრძელდება – არტარეა წარმოგიდგენთ ქართული კინოს მთავარ ხმას – ნანი ბრეგვაძეს

საღამოზე გაჟღერდება  ქართულ კინოფილმებში ნანი ბრეგვაძის მიერ შესრულებული ყველასათვის საყვარელი და ცნობილი სიმღერები.

მონაწილეობენ: ნანი ბრეგვაძე, ნიკოლოზ რაჭველი, მთხრობელი ცირა ელისაშვილი. ღონისძიება გაიმართება 16 ივნისს, 20:00 სთ-ზე.

წყარო: https://www.facebook.com/

ნახეთ: Frozen-ის მეორე ნაწილის ტრეილერი გამოვიდა.

ანიმაციური ფილმი 22 ნოემბერს გამოდის და ის ანასა და ელზას ახალ თავგადასავალზე მოგვითხრობს.

წყარო: https://www.youtube.com/

დედოფალმა ელისაბედ II-მ  ოლივია კოლმანს ბრიტანეთის იმპერიის ორდენი უბოძა.

ღონისძიება დედოფლის 93 წლის იუბილესთან დაკავშირებით გაიმართა.

წყარო: https://www.townandcountrymag.com/