ავტორი: ნინა პატარიძე
ფოტო : სანდრო სულაბერიძე
27 სექტემბერს თბილისში ახალი გალერეა – 4710 გაიხსნება, რომელიც სოლოლაკში აშენებულ ერთ-ერთ პირველ სახლში, ამაღლების ქუჩის 19 ნომერში მდებარეობს.
გალერეის დამფუძნებლები ახალგაზრდა კურატორები – ნინი დარჩია და ანა გაბელაია არიან.
At.ge წარმოგიდგენთ ინტერვიუს გალერეის დამფუძნებლებთან:
ნინი: მიუხედავად იმისა, რომ თბილისის სახელოვნებო სცენას ბოლო წლებში ბევრი გალერეა შეემატა, ვფიქრობ, მაინც განვიცდით მრავალფეროვანი, ექსპერიმენტული სივრცეებისა და შესაბამისი გამოფენების ნაკლებობას. ესეც იყო ერთ-ერთი მიზეზი, რატომაც რამდენიმე თვის წინ გამიჩნდა გალერეისა და სარეზიდენციო პროგრამის გაკეთების იდეა.
ანა: ჩვენი თანამშრომლობის დაწყება ძალიან ჰგავდა ჩვეულებრივ დამთხვევას, მაგრამ დამთხვევების დიდად არ მჯერა. უფრო მგონია, რომ მსგავსი შემთხვევები ტყეში დატოვებული მინიშნებებივითაა, რომლითაც ხვდები, რომ სწორად მიდიხარ. ამიტომაც ამ დროს გადაწყვეტილებებს უფრო ინტუიციურად იღებ, ჩვენი თანამშრომლობის პროცესიც, ვფიქრობ, ორივეს მხრიდან ინტუიციურად დაიწყო.
ნინი: ეს არის უშბის სიმაღლე. მიუხედავად იმისა, რომ აღმოჩნდა, ამ მთისადმი ორივეს განსაკუთრებული დამოკიდებულება გვაქვს, შეიძლება ითქვას, რომ ამ სახელწოდებამდეც შემთხვევით მივედით.
ანა: რაც დანამდვილებით ვიცით, ისაა, რომ გვინდა ეს გალერეა და ჩვენც მაქსიმალურად გახსნილები ვიყოთ ახალი გამოწვევებისთვის. ეს პრინციპი ვრცელდება როგორც საგამოფენო სივრცეზე, ასევე 4710-ის სარეზიდენციო პროგრამაზეც. ვგეგმავთ სისტემატურ შეხვედრებს და დისკუსიებს არა მხოლოდ სახელოვნებო, არამედ სხვა აქტუალურ თემებზეც. ექსპერიმენტულად ვუდგებით სოციალურ მედიასაც, ჩვენი ინსტაგრამის გვერდს ჩვენ გარდა ის ხელოვანებიც წარმოადგენენ, რომლებთანაც ვითანამშრომლებთ. გვაქვს სხვა სამომავლო გეგმებიც, მაგრამ არის რაღაცები, რაც ჯერ ჩვენც არ ვიცით და ძალიან მოგვწონს პროცესი, რომ ერთდროულად მივყვებით გეგმასაც და დინებასაც. იმედი გვაქვს, მთელი წლის განმავლობაში ბევრ საინტერესო კოლაბორაციას შემოგთავაზებთ.
ნინი: რეზიდენციის ფორმატი ჯერ კიდევ ყალიბდება და მნიშვნელოვნადაა დამოკიდებული პარტნიორებზე, რომლებსაც ამჟამად ვეძებთ. რეზიდენცია ინტერნაციონალური იქნება და რამდენიმე მიმართულებით იმუშავებს. მათ შორისაა სახელოვნებო მიმოცვლის ინტენსიურობა ჩვენს მეზობელ ქვეყნებთან და თანამშრომლობა იმ ქვეყნების ხელოვანებთან, რომელთა სახელოვნებო სცენა და სპეციფიკა ჯერ კიდეც უცხოა ქართველი აუდიტორიისთვის. რეზიდენციის მიზანია ორმხრივი ინფორმაციისა და გამოცდილების გაცვლა, შესაბამისად, მისი დასკვნითი ნაწილი შეიძლება იყოს ნებისმიერი ფორმატის: გამოფენა, “თოქი”, ვორქშოფი და ა.შ.
ანა: რადგანაც გალერეას სწორედ ეს გამოფენა ხსნის, მუშაობის პროცესი განსაკუთრებით საპასუხისმგებლო და ამავე დროს საინტერესო აღმოჩნდა. ჩვენი, ქეთას და ანდრიას ხედვები ბევრ საკითხში გადაიკვეთა, რამაც ეს პროცესი კიდეც უფრო თავისუფალი და ცოცხალი გახადა. თავიდანვე ვიცოდით, რა განწყობა გვინდოდა დაგვეხვედრებინა დამთვალიერებლისთვის, თუმცა ამ განწყობის შესაქმნელად საჭირო ელემენტები ბევრჯერ შეიცვალა და ექსპოზიციის აწყობის ბოლო მომენტამდე ჩვენც არ ვიყავით დარწმუნებულები საბოლოოდ რას დავტოვებდით საგამოფენო სივრცეში.
ნინი: გვინდა, რომ სივრცე მუდმივად აქტიური იყოს, ამიტომ, პროგრამულ გამოფენებს შორის (1,5-2 თვეში ერთხელ) პატარა პროექტებსაც ვგეგმავთ.
ანა: სამომავლო გეგმებზე მხოლოდ იმას გეტყვით, რომ ვაპირებთ ბევრი ახალგაზრდა საინტერესო ქართველი ხელოვანი გაჩვენოთ როგორც უკვე ნაცნობი, ასევე ჯერ კიდევ აღმოსაჩენი მხრიდან.
