ნორვეგიელი ფოტოგრაფი ბრიტ მერი ბაი ოსლოში ცხოვრობდა და მოღვაწეობდა. თუმცა, ერთმა პროექტმა მისი ქალაქური ცხოვრება თავდაყირა დააყენა და ხელოვანმა არქტიკაში დაიდო ბინა.
ყველაფერი კი ნორვეგიის ჩრდილოეთში, პოლარული წრის იქით, ფოტოგრაფის მოგზაურობით დაიწყო. თავისუფალ დროს ბრიტ მერი ბაი ცივილიზაციისგან მოწყვეტილ რეგიონებს სტუმრობდა და მიტოვებულ, ძველ სახლებს იღებდა.
ფოტოგრაფის თქმით, ჩრდილოეთში რამდენიმეწლიანი მოგზაურობისას, მოიხიბლა საოცარი კლიმატით, ულამაზესი პეიზაჟებით, ზოგჯერ დამაბრმავებელი და მუდამ ცვალებადი ნათებით, ადგილობრივების სტუმართმოყვარეობით. ოსლოში სახლი გაყიდა, დაემშვიდობა ოჯახს, მეგობრებს და ამჟამად არქტიკაში ცხოვრობს.
„აქ ყველაფერი სხვაგვარადაა, ივნისსა და სექტემბერშიც თოვლი და ყინვაა. არ იყო მარტივი ახალ გარემოსთან შეგუება და ყველაფრის თავიდან დაწყება. თუმცა, ამ სახლების ისტორია საოცარია და სწორედ ეს მაძლევს მოტივაციას“, – ამბობს ფოტოგრაფი.
