ისეთ ლეგენდარულ რეჟისორებს, როგორებიც არიან დევიდ ლინჩი, პიტერ გრინუეი, ტერი გილიამი, მიქელანჯელო ანტონიონი და აკირა კუროსავა, ცნობილი კინოფილმების გარდა, ხატვისადმი ვნებაც აერთიანებთ. ქვემოთ შეგიძლიათ მათ ნამუშევრებს გაეცნოთ.
1965 წლიდან დევიდ ლინჩი ფილადელფიაში, პენსილვანიის ხელოვნების აკადემიაში მხატვრობას, ქანდაკებასა და ფოტოგრაფიას სწავლობდა.
ლინჩი ავსტრიელი მხატვრის, ოსკარ კოკოშკას შემოქმედებით იყო მოხიბლული, ამავე დროს საყვარელ არტისტებად ფრენსის ბეკონსა და ედვარდ ჰოპერს ასახელებდა. მათი გავლენა აისახა როგორც ლინჩის ნახატებში, ასევე მის თითქმის ყველა ფილმში.
დევიდ ლინჩის პირველი პერსონალური გამოფენა 2015 წელს პენსილვანიის აკადემიაში გაიმართა.
პიტერ გრინუეი ბავშვობიდანვე ინტერესდებოდა ევროპული მხატვრობით და თავადაც სწავლობდა ხატვას. 14-15 წლის ასაკში ის პეიზაჟების ხატვამ გაიტაცა. 1960 წელს მან უოლტმესტოუს ხელოვნების სკოლაში ჩააბარა, სადაც 4 წელი ეუფლებოდა განათლებას.
პიტერ გრინუეი საკუთარი ფილმებისთვისაც აკეთებდა ჩანახატებს. რეჟისორი ინსპირაციის წყაროდ კარავაჯოს, რემბრანდტისა და ვერმეერის ნამუშევრებს ასახელებდა.
ტერი გილიამი განათლებით პოლიტოლოგია, თუმცა, არც ერთი დღე თავისი პროფესიით არ უმუშავია. სწავლის დროს რომ არ მოეწყინა, სამოყვარულო იუმორისტულ ჟურნალს გამოსცემდა ილუსტრაციებით. მოგვიანებით კი მხატვარ-ანიმატორობა დაიწყო და „მონტი პაიტონის“ სერიალს აფორმებდა აბსურდული გამოსახულებებით.
მიქელანჯელო ანტონიონის მხატვრობაში აკადემიური განათლება არ მიუღია. საყვარელ მხატვრებად მარკ როტკოსა და კოლდ მონეს ასახელებდა.
იაპონელი რეჟისორი კინემატოგრაფიაში მხატვრობიდან მოვიდა. ხატვა ბავშვობაში დაიწყო და მომავალსაც ამ სფეროში ხედავდა. 14 წლის ასაკში კუროსავა დასავლური ხელოვნების სკოლაში, Doshusha-ში ჩაირიცხა და სწავლის გაგრძელებას ტოკიოს სამხატვრო სკოლაში აპირებდა, თუმცა არ მიიღეს. მიუხედავად იმედგაცრუებისა, მან ხატვა მაინც განაგრძო და სულ მალე მისი ნამუშევარი „სეიბიცუ“ ნიკატენის პრესტიჟულ გამოფენაზე მოხვდა.
რეჟისორს ხატვა სიცოცხლის ბოლომდე არ შეუწყვეტია. მისი ნახატები, გრაფიკული ნამუშევრები მრავალ პრესტიჟულ მუზეუმში გამოიფინა მსოფლიოს მასშტაბით და გამოიცა რამდენიმე ალბომიც.
