ნიუ იორკი, ბავშვები და ქუჩის ფოტოგრაფია 80 წლის წინ – ელენ ლევიტი

ამერიკელი ფოტოგრაფი ელენ ლევიტი ნიუ-იორკში, ბრუკლინში გაიზარდა. სკოლა არ დაუმთავრებია, მხოლოდ ხელოვნების რამდენიმე კურსი გაიარა. ერთ-ერთ ასეთ კურსზე დაავალეს, ნიუ-იორკის ის კედლები გადაეღო, რომლებიც ბავშვებს ცარცით მოეხატათ. ლევიტმა Leica-ს კამერა შეიძინა და უოკერ ევანსისა და კარტიე-ბრესონის ნამუშევრებით შთაგონებულმა, ამგვარად დაიწყო საკუთარი ხელწერის ჩამოყალიბება.

ელენ ლევიტს ნიუ-იორკის ღარიბული უბნები: ისთ-საიდი, ბრონქსი, ჰარლემი და აქ მცხოვრები ბავშვები აინტერესებდა. მისი თქმით, აქ გაცილებით გახსნილი ხალხი ცხოვრობდა და ქუჩის ცხოვრება ვიზუალურად უფრო მდიდარი და მრავალფეროვანი იყო.

„ელენ ლევიტს აქვს საოცარი უნარი ყოველდღიურ ცხოვრებაში ისეთი არაორდინარული  დეტალები დაინახოს, რასაც ვერასოდეს ვამჩნევთ. მისი ნამუშევრები პოეზიის, მისტიკისა და დრამის სინთეზია. სწორედ ეს სძენს ლევიტის ფოტოგრაფიას განსაკუთრებულობას“, – ასე გამოეხმაურა New York Times ფოტოგრაფის პირველ სერიებს.

ელენ ლევიტმა თითქმის 70 წელი იმუშავა ქუჩის ფოტოგრაფად. დროთა განმავლობაში იცვლებოდა ქალაქის ურბანული გარემო, მისი ქუჩის ცხოვრებაც. „ადრე ქუჩებში ბავშვების ჟრიამული ისმოდა. ახლა ეს ადგილები ცარიელია. ხალხი სადღაც გაქრა, შენობებში გამოიკეტნენ“, – დანანებით აღნიშნავდა ფოტოგრაფი.