ლეონარდო და ვინჩის ჩანაწერების 570 გაციფრულებული ინტერნეტგვერდი საჯაროა

ბევრი რამ იცით ლეონარდო და ვინჩის შესახებ? მან დახატა “მონა ლიზა”! ის თავის ჩანაწერებს უკუღმა წერდა! ის აპროექტებდა საოცარ ხიდებსა და საფრენ მანქანებს! ის იყო გენიოსი… და კიდევ უამრავი რამ.

თუ თქვენ აღორძინების ხანის მკვლევარი არ ხართ, ნამდვილად გაოცდებით, რამდენი რამ არ იცით რენესანსის ამ უმნიშვნელოვანესი ადამიანის შესახებ, როცა ნახავთ მის ჩანაწერებს –  Codex Arundel-ს, რომელიც ბრიტანეთის ბიბლიოთეკამ გააციფრულა და საჯარო გახადა.

და ვინჩის ჩანაწერები უნივერსალური გონის ცოცხალი დოკუმენტაციაა და მიუხედავად იმისა, რომ თვითონ ტექნოფილი იყო, ლეონარდოს არანაირი ძალისხმევა არ დაუხარჯავს თავისი ჩანაწერების დასაბეჭდად და გამოსაცემად.

ასობით წლის მანძილზე და ვინჩის ჩანაწერების კოლექცია, კოლექციონერებს თუ არ ჩავთვლით, უხილავი რჩებოდა ყველასთვის. ლეონარდოს საფრანგეთში გარდაცვალების შემდეგ, მისმა შეგირდმა ფრანჩესკო მელციმ  ჩანაწერებისა და ნახატების დიდი ნაწილი უკან – იტალიაში ჩამოიტანა. მელცის მემკვიდრეებმა, რომლებსაც ჩანაწერების მნიშვნელობის არაფერი გაეგებოდათ, ისინი ნელ-ნელა გაანიავეს. ამის მიუხედავად და ვინჩის  “სარკისებურად დაწერილი” (მარჯვნიდან მარცხნივ) 5000 გვერდზე მეტი ჩანაწერი ჯერ კიდევ არსებობს. ამ ჩანაწერების რვეულებში და ვინჩი ხატავდა თვითმფრინავის, შვეულმფრენისა და პარაშუტის, ასევე წყალქვეშა ნავისა და ავტომობილის მოდელებს. ჩანაწერებიდან 300 წლის შემდეგ მის იდეებს ხორცი შეესხა.

ლეონარდო და ვინჩის ჩანაწერების დებიუტი 2007 წელს ბრიტანეთის ბიბლიოთეკისა და მაიკროსოფტის ერთობლივ პროექტ Turning the Pages 2.0-ის დროს შედგა. ეს ინტერაქტიული ფუნქცია საშუალებას აძლევს მკითხველს “გადაფურცლოს” და ვინჩის რვეული  ანიმაციის სახით. ეკრანზე გამოტანილი შენიშვნები მკითხველებს განუმარტავს დაშიფრული სიტყვების, ტექნიკური ნახატების, დიაგრამებისა და სქემების მნიშვნელობებს. ლეონარდოს გამაბრუებელი დოზისთვის შეგიძლიათ გადახედოთ Codex Arundel-ის 570 გაციფრებულ გვერდს. შედარებით უფრო დამუშავებული და იოლად წასაკითხი  ჩანაწერებისთვის კი შეგიძლიათ ნახოთ ბრიტანული ბიბლიოთეკის მოკლე სერიები და ვინჩის ცხოვრებისა და მოღვაწეობის შესახებ, რომელიც მისი საყვინთი აპარატის, პარაშუტისა და დელტაპლანის შესახებ განმარტებებსაც მოიცავს.

ბევრს შეიტყობთ თვითონ და ვინჩის პიროვნების შესახებაც – მათ შორის, იმას, რომ ის უპირატესობას წითელ რეიტუზებს ანიჭებდა, ასევე მხატვრის შოპინგის სიებს და სხვა პირად ინფორმაციებს. ლეონარდოს საკუთარი შიფრი შთამბეჭდავი მცდელობა იყო თავისი იდეების გარეშე თვალისგან დასაცავად. დღეს კი ამ გაციფრებული კოლექციების შედეგად უკვე ყველას შეუძლია ლეონარდოს გონის გამოკვლევა.

ორიგინალი: http://www.openculture.com